Aprelin 26-da Naxçıvanda Müstəqil Dövlətlər Birliyi üzrə Regional Rabitə Təşkilatının rabitə iqtisadiyyatı komissiyasının 31-ci iclası keçiriləcək.
Komissiyanın iclasında Regional Rabitə Təşkilatına üzv ölkələrin milli qanunvericiliyin müxtəlif istiqamətləri, beynəlxalq çağırışların başa çatdırılmasına operatorlararası tariflərin unifikasiyası üzrə işlər, stasionar və mobil şəbəkələrdə çağırışların “LRIC” modeli əsasında qiymətinin hesablanması, Azərbaycanda informasiya-kommunikasiya texnologiyaları sektorunun və informasiya cəmiyyətinin inkişafının iqtisadi aspektləri müzakirə olunacaq. Eyni zamanda operatorlararası mobil və stasionar rabitə xidmətləri bazarı təhlil ediləcək.
Bundan başqa, iclas zamanı rəqəmsal yayım xidmətlərinin tənzimlənməsi üzrə qaydalara, radiotezlik spektrinin və peyk orbitlərinin istifadəsinin tənzimlənməsi, insan resurslarının inkişaf etdirilməsi, informasiya-kommunikasiya texnologiyaları üzrə statistik göstəricilərin təkmilləşdirilməsi məsələlərinə baxılacaq.
Digər beynəlxalq tədbir isə aprelin 24-25-26-da Beynəlxalq Telekommunikasiya İttifaqının “İKT göstəricilərinin beynəlxalq standartlara uyğunlaşdırılması” mövzusunda üçgünlük seminardır.
Qeyd edək ki, hər iki tədbirdə 14 ölkədən 33 nəfər nümayəndənin iştirakı gözlənilir.

Naxçıvan Muxtar Respublikası
Rabitə və İnformasiya Texnologiyaları Nazirliyinin mətbuat xidməti