Muxtar respublikamızda cari ildə də iməciliklər mütəşəkkilliklə davam etdirilir, meyvə bağlarına, yaşıllıq zolaqlarına, gülkarlıq sahələrinə aqrotexniki qulluq göstərilir, yeni yaşıllıqlar salınır, ağac və gül kolları əkilir.
Aprelin 9-da keçirilən iməciliklər də yüksək səviyyədə təşkil olunmuşdu. Həmin gün iməciliyə 24 min 92 nəfər çıxmış, ümumilikdə, 15 min 900 ədəd ağac və bəzək kolları əkilmişdir. Bunlardan 4200 ədədi meşə, 6840 ədədi meyvə ağacı, 560 ədədi həmişəyaşıl ağac, 4300 ədədi gül və bəzək kolları olmuşdur.
Həmin gün Naxçıvan şəhərinin sakinləri Sement Zavodunun yaxınlığındakı 0,4 hektarlıq ərazidə 350 ədəd meyvə ağacı, Dövlət Avtomobil Müfəttişliyinin yaxınlığındakı 1 hektarlıq ərazidə 300 ədəd meyvə ağacı və şəhərdəki parklarda, ümumilikdə, 3000 ədəd gül kolu əkmişlər.
Naxçıvan-Sədərək magistral yolunun Zeyvə, Maxta və Dəmirçi kəndləri hissəsində əkilmiş 2500 ədəd meşə ağacı, 500 ədəd gül kolu, Mahmudkənddəki stadionun ətrafında əkilmiş 400 ədəd meyvə ağacı, 60 ədəd həmişəyaşıl ağac və 500 ədəd gül kolu Şərur rayonunun yaşıl örtüyünü daha da zənginləşdirəcək.

İməcilik günü babəklilər Əshabi-Kəhf ziyarətgahına gedən yolun, Naxçıvan-Şahbuz-Batabat və Naxçıvan-Culfa magistral yolunun kənarlarındakı yaşıllıqlara aqrotexniki qulluq göstərmişlər.
Bağlar diyarı Ordubad rayonunda da iməciliklər mütəşəkkilliklə keçirilmişdir. Belə ki, Əylis düzündəki 9,5 hektarlıq ərazidə 3750 ədəd meyvə, kəndlərdə 1400 ədəd meyvə və 600 ədəd meşə ağacı əkilmişdir.
Culfalılar Əlincəqalanın ətəklərində 500 ədəd meşə ağacı və 500 ədəd həmişəyaşıl ağac əkməklə mütəşəkkillik göstərmişlər.
Kəngərli rayonunun sakinləri Naxçıvan-Sədərək magistral yolunun kənarlarındakı yaşıllıqlara aqrotexniki qulluq göstərmişlər.
Şahbuzlular Su Təmizləyici Qurğu Kompleksinin yaxınlığındakı 0,9 hektarlıq ərazidə 640 ədəd meyvə ağacı əkinini həyata keçirmişlər.
Sədərəklilər Naxçıvan-Sədərək magistral yolunun sağ və sol hissələrində bərpa məqsədilə 600 ədəd meşə ağacı, Heydərabad qəsəbəsindəki park və xiyabanlarda 300 ədəd gül kolları əkməklə yaşıllıq sahələrini genişləndirmişlər.
Həmin gün muxtar respublikamızın bütün bölgələrində ahıl vətəndaşların həyətlərində təmizlik, abadlıq işləri aparılmışdır.

Xəbərlər şöbəsi