Naxçıvan Muxtar Respublikasının Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyası narkomaniyaya qarşı mübarizə tədbirlərini davam etdirir.
Dekabrın 17-də Müsadirə edilmiş narkotik vasitələri, psixotrop maddələri və onların prekursorlarının məhvetmə komissiyası tərəfindən Naxçıvan Şəhər Məhkəməsinin inzibati xəta haqqında material üzrə 1 oktyabr 2015-ci il tarixli qərarı əsasında məhv edilməsi nəzərdə tutulmuş çəkisi 0,428 qram olan tiryək və çəkisi 0,012 qram olan heroin, Naxçıvan Muxtar Respublikası Ağır Cinayətlər Məhkəməsinin cinayət işləri üzrə 19 oktyabr və 28 oktyabr 2015-ci il tarixli hökmləri əsasında məhv edilməsi nəzərdə tutulmuş 124,736 qram heroin, 22 ədəd çətənə kolu və 10 ədəd yaşıl çətənə kolunun budaqları yandırılıb. Yandırılma prosesindən öncə komissiya üzvlərinin iştirakı ilə Məhkəmə Ekspertizası Mərkəzində saxlanılan həmin narkotik maddələrin naturada üzləşdirilməsi aparılıb, bağlılığı, açılmadığı, möhürlərin yerində olduğu müəyyənləşdirilib. Sonra həmin maddələr Naxçıvan Muxtar Respublikasının Yoluxucu Xəstəliklər Mərkəzində yandırılmaqla məhv edilib.
Bundan başqa, qanunsuz əldə edilmiş müxtəlif dərman preparatları da yandırılıb.

Xəbərlər şöbəsi