Naxçıvan Muxtar Respublikasının daxili işlər orqanlarında vakant vəzifələrin tutulması üçün bu il oktyabrın 17-də müsabiqə elan edilib.
Dekabrın 11-də Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın test mərkəzində imtahanların keçirilməsinə başlanılıb. İmtahanlarda iştirak etmək üçün 45 namizəd sənəd təqdim edib. Onlardan 10 nəfəri polis sahə inspektoru, 35 nəfəri isə yetkinlik yaşına çatmayanlarla profilaktik işin təşkili üzrə inspektor vəzifəsini seçib. İmtahanda namizədlərə ixtisas üzrə 80, məntiqi təfəkkürün yoxlanılması üzrə 20 sual olmaqla, 100 sual təqdim edilib, sualları cavablandırmaq üçün 2 saat 30 dəqiqə vaxt ayrılıb. Test imtahanında şəffaflığın təmin edilməsi məqsədilə prosesin videoçəkilişi aparılıb. İmtahan başa çatdıqdan sonra namizədlərə cavab kartı və test imtahanının nəticəsinə dair arayış təqdim edilib. Naxçıvan Muxtar Respublikası Daxili İşlər Nazirliyinin əməkdaşları imtahanda müşahidəçi qismində iştirak ediblər.
Məlumat üçün qeyd edək ki, test imtahanları dekabrın 14-dək davam edəcək. İmtahanlarda keçid balını toplayan namizədlər müsahibə mərhələsində iştirak etmək hüququ qazanacaqlar.

Xəbərlər şöbəsi