10-17 noyabr – Beynəlxalq Tələbə-Gənclər Həftəsi ilə əlaqədar Naxçıvan Muxtar Respublikasında fəaliyyət göstərən ali və orta ixtisas təhsili müəssisələrinin tələbələri arasında keçirilən tədbirlərə yekun vurulub.
Noyabrın 17-də Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi, Naxçıvan Muxtar Respublikası Ali Məclisinin Sədri yanında Gənclər Fondu və Gənclər və İdman Nazirliyinin təşkilatçılığı ilə keçirilən yarışların qaliblərinin mükafatlandırılması mərasimi olub.
Naxçıvan şəhərindəki “Gənclik” Mərkəzində keçirilən tədbirdə ilk olaraq Beynəlxalq Tələbə-Gənclər Həftəsi ilə bağlı məlumat verilib.
Sonra ötən həftə ərzində keçirilən yarış, müsabiqə və oyunların qaliblərinə mükafatlar təqdim edilib.
Tədbirdə Naxçıvan Dövlət Universitetinin İncəsənət fakültəsi tələbələrinin ifasında mahnılar səsləndirilib.
Qeyd edək ki, Beynəlxalq Tələbə-Gənclər Həftəsində badminton, şahmat idman növləri üzrə yarışlar, həmçinin şən və hazırcavablar klubları arasında müsabiqə və “Nuh yurdu” intellektual oyunu təşkil olunub.
Xəbərlər şöbəsi
