1 noyabr 2015-ci il Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə seçkilər günüdür
Azərbaycan Respublikasının Milli Məclisinə seçkilər muxtar respublikada 7 seçki dairəsi üzrə, Naxçıvan Muxtar Respublikasının Ali Məclisinə seçkilər isə 45 seçki dairəsi üzrə keçiriləcəkdir.
Seçki məntəqəsinin açılması
Seçki günü səhər saat 700-dən gec olmayaraq məntəqə seçki komissiyasının üzvləri seçki məntəqəsini səsvermə prosesinə hazırlamaq üçün toplaşırlar. Məntəqə seçki komissiyasının bütün üzvləri işə hazır olmalıdırlar. Seçki məntəqəsi açılmazdan əvvəl məntəqə seçki komissiyasının sədri komissiya üzvləri arasında aparılan vəzifə bölgüsünü təsdiqləyir və onlar öz iş yerlərini tuturlar. Məntəqə seçki komissiyası üzvlərinin vəzifə bölgüsü sədrin razılığı ilə komissiya üzvlərinin fikirləri nəzərə alınmaqla dəyişdirilə bilər. Seçki məntəqəsinin açılışına hazırlıq üçün sədr və ya onu əvəz edən komissiya üzvü aşağıdakı tapşırıqları verir:
Seçki materiallarının və avadanlıqlarının hazırlanması
Məntəqə seçki komissiyasının üzvləri seçki məntəqəsində işin təşkilinə cavabdehdirlər. Səsvermə kabinələri və müvafiq məlumat lövhələri düzəldilməli, səsvermə qaydasına dair təlimat plakatları divara vurulmalı və səsvermə kabinələrində yerləşdirilməli, məntəqə seçki komissiyasının möhürü, gözəgörünməyən mürəkkəb balonları, ultrabənövşəyi lampa, batareyalar, səsvermə üçün zəruri olan material və avadanlıqlar hazırlanmalıdır.
Səsverməyə dair təlimat və məlumat plakatları
Məntəqə seçki komissiyasının sədri səsvermə otağında asılmış seçki bülleteninin doldurulmasına dair izahın səsvermə kabinəsində də yerləşdirilməsini təmin etməlidir. O, səsvermə saatlarında həmin plakatların yerində olmasını müntəzəm surətdə yoxlamalıdır.
Təşviqat materiallarının seçki
məntəqəsindən çıxarılması
Məntəqə seçki komissiyasının üzvləri səsverməyə 24 saat qalmış seçicilərin maarifləndirilməsi üçün nəzərdə tutulan məlumatlar istisna olmaqla, bütün təşviqat materiallarını səsvermə otağının daxilindən və xaricindən çıxarmalıdırlar.
Akkreditasiyanın yoxlanılması
Məntəqə seçki komissiyasının katibi seçki məntəqəsinə gəlmiş bütün müşahidəçilərin akkreditasiyasını və qeydə alınmış namizədlərin, onların səlahiyyətli nümayəndələrinin və vəkil edilmiş şəxslərinin, siyasi partiyaların, siyasi partiyalar bloklarının səlahiyyətli nümayəndələrinin, vəkil edilmiş şəxslərinin və KİV nümayəndələrinin lövhəciklərini yoxlamalıdır.
Dairə seçki komissiyasından alınmış seçki bülletenlərinin sayılması və qeydiyyatı
Səsvermə başlanmazdan əvvəl məntəqə seçki komissiyasının üzvləri buna hüququ olan şəxslərin müşahidəsi ilə seçki bülletenlərini sayır, onların hər birinin məntəqə seçki komissiyası tərəfindən əvvəlcədən möhürləndiyini yoxlayır (bülletenlər Azərbaycan Respublikasının Milli Məclisinə seçkilər üzrə Azərbaycan Respublikası Seçki Məcəlləsinin 99.6-cı, Naxçıvan Muxtar Respublikasının Ali Məclisinə seçkilər üzrə “Naxçıvan Muxtar Respublikası Ali Məclisinə seçkilər haqqında” Naxçıvan Muxtar Respublikası Qanununun 86.6-cı maddəsinə uyğun olaraq dairə seçki komissiyasından alındıqdan sonra onların üz tərəfinin yuxarı sağ küncü məntəqə seçki komissiyasının möhürü ilə möhürlənir) və bu barədə akt tərtib edirlər. Seçki bülletenlərinin sayı dəqiqləşdirildikdən sonra məntəqə seçki komissiyasının sədri onların sayını elan edir. Bu məlumat səsvermənin nəticələri haqqında protokolun qaralama nüsxəsinin 3-cü bəndinə daxil edilir.
Seçki qutularının hazırlanması
Səhər saat 750-də məntəqə seçki komissiyasının sədri seçki məntəqəsini açıq elan edir, boş seçki qutularını seçki komissiyasının üzvlərinə, seçki məntəqəsində olan müşahidəçilərə göstərir, onları bağlayır, fərdi nömrələnmiş və təhlükəsizlik üçün nəzərdə tutulmuş birdəfəlik plastik kilidlərlə bağlayır. Sədr həmin kilidlərin fərdi nömrələrini elan edir. Bu nömrələr məntəqə seçki komissiyasının müvafiq aktında qeyd olunur. Səsvermə günü seçki qutuları müşahidəçilərin və məntəqə seçki komissiyası üzvlərinin maneəsiz daim müşahidə edə biləcəyi yerdə yerləşdirilməlidir.
Mürəkkəb və ultrabənövşəyi lampaların yoxlanılması
Mürəkkəb və ultrabənövşəyi lampalar seçki məntəqəsi açılmazdan əvvəl müşahidəçilərin müşahidəsi ilə yoxlanılır. Yoxlama səsvermə otağında, məntəqə seçki komissiyası üzvlərinin birinin çeçələ barmağında aparılır və mürəkkəb balonları səsvermə otağında, masanın üstündə, hamının sərbəst görə biləcəyi yerdə saxlanılır.
Səsvermənin yekunları barədə məlumatları göstərmək məqsədilə böyüdülmüş protokol nümunələrinin asılması
Səsvermə otağında səsvermənin yekunları barədə məlumatları göstərmək məqsədilə səsvermənin yekununa dair böyüdülmüş protokol nümunələri asılmalıdır.
Səsvermənin başlanmasının elan edilməsi
Səhər saat 800-də məntəqə seçki komissiyasının sədri səsvermənin başlanmasını ucadan elan edir.
Səsvermə günü seçki məntəqəsində kimlər ola bilər:
• məntəqə seçki komissiyasının üzvləri;
• Mərkəzi Seçki Komissiyası və dairə seçki komissiyasının üzvləri;
• qeydə alınmış namizədlər, onların səlahiyyətli nümayəndələri və vəkil edilmiş şəxsləri, siyasi partiyaların səlahiyyətli nümayəndələri və vəkil edilmiş şəxsləri, akkreditasiyadan keçmiş beynəlxalq və yerli müşahidəçilər;
• KİV nümayəndələri;
• seçicilər (o cümlədən səsvermənin həyata keçirilməsi zamanı yardıma ehtiyacı olan seçicilərə kömək edən şəxslər).
Zəruri hallarda aşağıdakı şəxslər də ola bilərlər:
• səsvermə hüququnu həyata keçirən zaman və ya məntəqə seçki komissiyasının sədrinin dəvəti ilə yalnız ictimai asayişi bərpa etmək üçün xidməti geyim formasında olan polis işçiləri;
• müvafiq mütəxəssislər (məntəqə seçki komissiyası sədrinin dəvəti ilə yalnız texniki problemləri həll etmək üçün);
• zəruri yardıma ehtiyac olan hallarda kömək üçün dəvət edilən mütəxəssislər (təcili tibbi yardım, yanğınsöndürmə və sair üzrə mütəxəssislər).
Onlar vəzifələrini icra edən kimi seçki məntəqəsini tərk etməlidirlər.
Səsvermə prosesi
Seçici səs vermək üçün şəxsiyyət vəsiqəsini və ya onu əvəz edən müvafiq sənədi təqdim etməlidir.
Seçicini qarşılayan və barmağının mürəkkəblə işarələnməsini yoxlayan məntəqə seçki komissiyasının üzvü:
• seçki məntəqəsinə gələn hər bir seçicini səsvermə otağının girişində salamlayır;
• seçicilərin şəxsiyyətini təsdiqləyən müvafiq sənədini yoxlayır;
• ultrabənövşəyi lampa vasitəsilə seçicinin sol əlinin baş barmağının dırnaq və dərisinin bir hissəsinin gözəgörünməyən mürəkkəblə işarələnib-işarələnmədiyini yoxlayır və yəqin edir ki, seçici səs verməyib. Ultrabənövşəyi işıq seçicinin sol əlinin baş barmağı boyunca salınmalıdır;
• əgər seçicinin barmağı artıq mürəkkəblə işarələnmişsə, məntəqə seçki komissiyasının üzvü ondan dərhal məntəqəni tərk etməsini tələb edir və seçicinin bu tələbi yerinə yetirməsinə əmin olur;
• hər bir seçicidən səsvermə prosesinə aid sualı olub-olmamasını soruşur;
• barmağında mürəkkəb olmayan seçiciyə məlumat lövhəsinə və sonra bülleten verən və seçicinin barmağını mürəkkəblə işarələyən məntəqə seçki komissiyasının üzvünə yaxınlaşmağı tövsiyə edir.
Səs vermək üçün seçici aşağıdakı sənədlərdən birini təqdim etməlidir:
1. Azərbaycan Respublikasının vətəndaşları üçün:
- şəxsiyyət vəsiqəsi;
- müvəqqəti şəxsiyyət vəsiqəsi.
2. Qaçqın və məcburi köçkün vətəndaşlar üçün:
- 1-ci bənddə göstərilən şəxsiyyətlərini təsdiq edən sənəd yoxdursa, Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsi tərəfindən müəyyənləşdirilmiş formalı vəsiqə.
3. Həqiqi və ya müddətli hərbi xidmətdə olan hərbi qulluqçular üçün:
- zabitin şəxsi vəsiqəsi;
- hərbi bilet.
4. Barələrində həbs növündə qətimkan tədbiri seçilərək istintaq təcridxanalarında saxlanılan təqsirləndirilən şəxslər üçün:
- Ədliyyə Nazirliyinin Penitensiar Xidməti tərəfindən verilmiş təqsirləndirilən şəxsin şəxsiyyətini təsdiq edən sənəd.
5. Azadlıqdan məhrumetmə yerlərində və xüsusi müəssisələrdə cəza çəkən məhkumlar üçün:
Yadda saxla!
Seçki prosesində yuxarıda göstərilən sənədlərdən başqa, digər sənədlərdən istifadə olunması yolverilməzdir.
- Ədliyyə Nazirliyinin Penitensiar Xidməti tərəfindən verilmiş məhkumun şəxsiyyətini təsdiq edən sənəd.
Seçicinin barmağını mürəkkəblə işarələyən və bülleten verən məntəqə seçki komissiyasının üzvü:
• seçicinin adını və soyadını soruşur və şəxsiyyətini təsdiq edən müvafiq sənədi təqdim etməyi ondan xahiş edir;
• seçicinin adını seçicilər siyahısında tapır;
• təqdim olunmuş şəxsiyyəti təsdiq edən sənədin seriyası və nömrəsini seçicilər siyahısında seçicinin adı qarşısında qeyd edir;
Yadda saxla!
Barmağının mürəkkəblə işarələnməsinə etiraz edən seçiciyə seçki bülleteninin verilməyəcəyi izah edilir. Əgər seçici fikrini dəyişməzsə, ondan seçki məntəqəsini tərk etməsi xahiş olunur. Bu barədə seçici siyahısında “işarələnmədən imtina etdi” qeydi aparılır.
• seçiciyə sol əlinin baş barmağının gözəgörünməyən mürəkkəblə işarələnməsini təklif edir;
• seçici razılaşarsa, onun sol əlinin baş barmağının dırnaq və dərisinin bir hissəsini gözəgörünməyən mürəkkəblə işarələyir və işarələndiyini yəqin edir. O, seçicini təlimatlandırır ki, mürəkkəb quruyanadək barmağına toxunmasın;
• seçiciyə möhürlənmiş seçki bülleteni verir. Seçki bülletenini seçiciyə verərkən bülletenin nömrələnmiş yuxarı sol küncünü kəsir və özündə saxlayır;
• adı seçicilər siyahısında olan seçicidən siyahıda adının qarşısındakı “seçicinin seçki bülletenini alması haqqında imza” qrafasında imza etməsini xahiş edir;
• seçicini boş səsvermə kabinəsinə keçib seçki bülletenində istədiyi namizədin soyadından sağdakı kvadratda işarə etdikdən sonra bülleteni qatlaması və seçki qutusuna salaraq seçki məntəqəsini tərk etməsi barədə təlimatlandırır.
Məntəqə seçki komissiyasının seçki qutusunun mühafizəsi üçün cavabdeh üzvü:
• o, seçicinin seçki bülletenini qatlayaraq seçki qutusuna salmasına əmin olur;
• səs vermiş seçicidən seçki məntəqəsini tərk etməsini xahiş edir.
Naxçıvan Muxtar Respublikası
Mərkəzi Seçki Komissiyası
