İyulun 11-də muxtar respublikanın şəhər və rayonlarında keçirilən iməciliklər mütəşəkkilliyi ilə yadda qalmışdır.
Naxçıvan şəhərinin sakinləri Uzunoba Su Anbarının yaxınlığındakı yaşıllıq sahəsində, müəssisə və təşkilatların ərazilərindəki ağaclara aqrotexniki qulluq göstərmişdir.
Şərur rayonunda keçirilən iməciliklərdə də əhalinin mütəşəkkilliyi müşahidə edilmiş, rayonun Zeyvə, Yuxarı Daşarx və Dizə kəndlərindəki yaşıllıq sahələrində təmizlik və suvarma işləri görülmüşdür.
Babək rayonunun sakinləri isə Babək qəsəbəsində və “Əshabi-Kəhf Ziyarətgahı” Dini-Mədəni Abidə Kompleksinə gedən yolun kənarlarındakı ağaclara aqrotexniki qulluq göstərmişlər.
Ordubad rayonunda keçirilən iməciliklərdə rayon sakinləri Naxçıvan-Ordubad magistral yolunun “Əylis düzü” adlanan hissəsində, Aşağı Əylis yolunda və rayon Mərkəzi Xəstəxanasının həyətindəki yaşıllıqlarda təmizlik və suvarma işləri aparmışlar.
Culfa rayonunda keçirilən iməciliklərdə də fəallıq müşahidə olunmuşdur. Rayon sakinləri Əlincə qalasının ətəklərindəki yaşıllıqlarda 200 ədəd meyvə ağacı əkmiş, müəssisə və təşkilatların ərazilərində ağacların diblərini alaq otlarından təmizləyərək suvarmışlar.
Kəngərli rayonunun sakinləri Naxçıvan-Sədərək magistral yolunun sağ və sol hissəsində, rayon İcra Hakimiyyətinin qarşısında və Qarabağlar kənd 1 nömrəli tam orta məktəbin həyətindəki yaşıllıqlara aqrotexniki qulluq göstərmişlər.
Şahbuzlular şəhərin girişindəki yaşıllıq sahəsində 100 ədəd həmişəyaşıl ağac əkmiş, müəssisə və təşkilatların ərazilərindəki yaşıllıqlara qulluq etmişlər.
Sədərək rayonunda da iməciliklər mütəşəkkilliklə davam etdirilmiş, Naxçıvan-Sədərək magistral yolunun sağ hissəsində, Qaraağac kəndində yol kənarlarında və Sədərək kənd 1 nömrəli tam orta məktəbin həyətindəki yaşıllıqlara aqrotexniki qaydada qulluq göstərilmişdir.
Ümumilikdə, iyulun 11-də muxtar respublikada keçirilən iməciliklərdə 23 min 986 nəfər iştirak etmiş, 300 ədəd ağac və bəzək kolları əkilmişdir.
Həmin gün muxtar respublikamızın bütün bölgələrində ahıl vətəndaşların həyətlərində təmizlik, abadlıq işləri aparılmışdır.
Səbuhi Həsənov
