Şərur rayonundakı Azərbaycanın Milli Qəhrəmanı Kərim Kərimov adına Qarahəsənli kənd tam orta məktəbində Xocalı faciəsinin 21-ci ildönümü ilə əlaqədar tədbir keçirilib. Tədbirə toplaşanlar əvvəlcə Kərim Kərimovun məktəbin həyətində ucaldılan büstü önünə tər gül dəstələri düzüblər. Məktəbin direktoru İbrahim Əhmədov Milli Qəhrəmanın adını daşıyan təhsil ocağının keçdiyi şərəfli yola nəzər salaraq pedaqoji kollektivin Vətən üçün layiqli gənclər yetişdirdiyini bildirib:
– Cəmi 21 illik ömür yolu keçmiş məzunumuz Kərim Kərimov torpaqlarımızın azadlığı və bütövlüyü, müstəqilliyimizin daimi və əbədiliyi uğrunda şəhid olub.
1992-ci il may ayının 18-də məktəbin daha bir məzunu – 19 yaşlı Muxtar Məmmədov da Sədərək döyüşlərində qəhrəmancasına vuruşaraq şəhidlik zirvəsinə ucalıb. Sözsüz ki, hər iki igidin gənclərə örnək olan ömür yolu barədə oxuduqları təhsil ocağında bu kimi tədbirlərin keçirilməsinin məqsədi düşmən üzərində qələbəyə inamı artırmaqdır. Hər iki igid və cəsur Vətən oğlunun şərəfli ömür yolunun təbliği gənc nəslin torpağa bağlılıq hissinin yüksəldilməsində də vacib amillərdəndir.

Məktəbin təşkilatçısı Hüseyn Cəfərovun quruluşu əsasında VIII, IX və X sinif şagirdlərinin hazırladıqları bədii hissə, sadəcə, Xocalı faciəsinin ağrı-acılarını yaşatmadı, çıxışların hər birində mübarizlik, döyüşkənlik, Vətənə məhəbbət, düşmənə nifrət hissləri özünü göstərdi. Xalqımızın igid, cəsur, düşmən gülləsindən qorxmayan qəhrəmanlarının obrazını yaradan məktəblilər Vətən uğrunda şəhidliyin şərəfini yaşamağı bir daha təlqin və təqdir etdilər.
Tədbiri Azərbaycan torpaqlarının bütövlüyü uğrunda mübarizənin əks-sədası kimi də qiymətləndirmək mümkündür. Xocalıda, Şuşa və Laçında, Ağdam və Kəlbəcərdə, Füzuli və Cəbrayılda, Zəngilanla Qubadlıda, külli Qarabağda, İrəvan, Zəngəzur və Göyçədə söndürülmüş ocaqların yenidən yandırılması üçün hər bir şagirdin qəlbində sanki Vətən məhəbbətindən qığılcımlanan tonqallar çatılmışdı.

Xəbərlər şöbəsi