Babək Rayon Mərkəzi Xəstəxanasında Milli Qurtuluş Gününə həsr olunmuş tədbir keçirilmişdir.
Tədbiri giriş sözü ilə Babək Rayon Mərkəzi Xəstəxanasının baş həkimi Xəlil Cəfərəliyev açaraq 15 İyun – Milli Qurtuluş Gününün tarixindən söhbət açmışdır. Vurğulamışdır ki, ümummilli lider Heydər Əliyevin Azərbaycanda ikinci dəfə siyasi hakimiyyətə qayıdışından sonra ölkədə vətəndaş müharibəsinə son qoyulmuş, separatçı qüvvələr zərərsizləşdirilmiş, demokratik dövlət quruculuğu prosesinə başlanmışdır.
Sonra çıxış edən Babək Rayon İcra Hakimiyyəti başçısının birinci müavini Əbdülhüseyn Zamanov qeyd etmişdir ki, ulu öndər Heydər Əliyevin 1993-cü ildə Azərbaycan rəhbərliyinə qayıdışı ilə ölkəmizdə müstəqillik, Azərbaycançılıq, dövlətçilik, ədalətlilik, demokratiya, milli tərəqqi, dünyəvilik kimi ümumbəşəri dəyərlərə söykənən milli ideologiya formalaşdırılmış və bu, dövlət quruculuğu prosesinin əsas siyasi xəttinə çevrilmişdir.

Bununla yanaşı, ölkənin ictimai-siyasi, sosial-iqtisadi, elmi-mədəni həyatında, beynəlxalq əlaqələrində dönüş yaranmışdır.
Vurğulanmışdır ki, bu gün dahi rəhbər Heydər Əliyevin quruculuq, inkişaf yolu ölkə Prezidenti cənab İlham Əliyev tərəfindən uğurla davam etdirilir. Azərbaycanın hər tərəfində olduğu kimi, onun ayrılmaz tərkib hissəsi olan Naxçıvan Muxtar Respublikasında da ulu öndərin siyasi xətti zənginləşdirilərək davam etdirilir, gələcəyimizlə, inkişafımızla bağlı əbədi liderin arzuları böyük inamla həyata keçirilir.
Yeni Azərbaycan Partiyasi Babək Rayon Mərkəzi Xəstəxanası ərazi ilk partiya təşkilatının sədri Hüseyn İsmayılov, xəstəxananın baş həkiminin müavini Vəliqulu Həsənov ümummilli lider Heydər Əliyevin Azərbaycanda siyasi hakimiyyətə qayıdışının tarixi səbəblərindən danışmış, ümummilli liderin ölkəmizin gələcəyi naminə göstərdiyi xidmətlərdən söhbət açmışlar.
Tədbirə Babək Rayon Mərkəzi Xəstəxanasının baş həkimi Xəlil Cəfərəliyev yekun vurmuşdur.

Xəbərlər şöbəsi