Dünən AMEA Naxçıvan Bölməsində böyük Azərbaycan ədibi, filosof-alim, XX əsr Azərbaycan-türk ictimai fikrinin ən görkəmli nümayəndələrindən biri, Azərbaycan mətbuatının inkişafında müstəsna xidmətləri olmuş Əli bəy Hüseynzadənin 150 illik yubileyi ilə əlaqədar elmi konfrans keçirilib.
Konfransı giriş sözü ilə açan AMEA Naxçıvan Bölməsinin sədri, akademik İsmayıl Hacıyev bildirib ki, 2014-cü il yanvar ayının 21-də Ə.Hüseynzadənin 150 illik yubileyinin keçirilməsi haqqında Azərbaycan Respublikasının Prezidenti cənab İlham Əliyev Sərəncam imzalayıb.
Qeyd edilib ki, bu sərəncam türk xalqlarının mədəni inteqrasiyasının məfkurə kimi təşəkkül tapmasında mühüm rol oynayan, müasir cəmiyyət quruculuğunda demokratik prinsiplərin ənənəvi dəyərlər zəminində bərqərar olmasının vacibliyini irəli sürən və müstəqil milli dövlətçiliyin nəzəri əsaslarının işlənib hazırlanmasında yaxından iştirak edən, eləcə də çoxşaxəli fəaliyyəti boyunca yaratdığı zəngin fəlsəfi-publisistik, ədəbi-elmi irsi sayəsində Azərbaycan maarifçiliyi tarixinə qiymətli töhfələr verən Əli bəy Hüseynzadənin Azərbaycan tarixindəki yerinə və roluna verilən ən böyük qiymətdir. Təsadüfi deyildir ki, bu gün Azərbaycan Respublikasının dövlət bayrağında əksini tapan türkləşmək, müasirləşmək və islamlaşmaq ideyaları məhz Əli bəy Hüseynzadə tərəfindən irəli sürülmüşdür.
Konfransda AMEA Naxçıvan Bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Əli bəy Hüseynzadənin həyat və yaradıcılığı”, həmin institutun Onomastika şöbəsinin müdiri, filologiya elmləri doktoru Adil Bağırov “Əli bəy Hüseynzadə və XX əsrin əvvəllərində dilçilik məsələləri”, Ədəbiyyatşünaslıq şöbəsinin müdiri, filologiya elmləri doktoru Fərman Xəlilov “Əli bəy Hüseynzadənin fikir dünyası”, institutun elmi katibi, filologiya üzrə fəlsəfə doktoru Ramiz Qasımov “Azərbaycan ictimai fikir tarixində iki məktəb, iki şəxsiyyət: Əli bəy Hüseynzadə və Cəlil Məmmədquluzadə” mövzularında çıxışlar ediblər.
Konfransa AMEA Naxçıvan Bölməsinin sədri, akademik İsmayıl Hacıyev yekun vurub.
Xəbərlər şöbəsi
