Dünən Heydər Əliyev adına Hərbi Liseyin müstəqil lisey kimi fəaliyyət göstərməsinin 10-cu ildönümü münasibətilə “Heydər Əliyev yolu ilə” adlı tədbir keçirilib.

Tədbiri Heydər Əliyev adına Hərbi Liseyin şəxsi heyətlə iş üzrə bölmə rəisi, polkovnik-leytenant Azad Cəfərov açıb.
Naxçıvan Muxtar Respublikası Gənclər və İdman Nazirliyinin Gənclərlə iş şöbəsinin müdiri Canməmməd Canməmmədov “Ulu öndər Heydər Əliyev və Azərbaycan gəncliyi” mövzusunda çıxış edərək ölkəmizdə dövlət-gənclər siyasəti istiqamətində həyata keçirilən tədbirlərdən danışıb. Qeyd olunub ki, ümummilli lider Heydər Əliyev daim gənclərə güvənərək onlara böyük etimad göstərib. Azərbaycanda gənclər siyasəti dövlət siyasətinin əsas tərkib hissəsi kimi xüsusi yer tutub və Azərbaycan gəncliyi dövlətin diqqət və qayğısını hər zaman öz üzərində hiss edib. Məhz ulu öndərimizin işləyib hazırladığı gənclər siyasəti gənclərimizin hərtərəfli inkişafını təmin edib.

Dahi şəxsiyyətin Azərbaycanda siyasi hakimiyyətə qayıdışından sonra fəaliyyətinin ilk dövrlərində – 1994-cü ilin iyulunda Gənclər və İdman Nazirliyinin yaradılması haqqında sərəncam imzalaması ilə müstəqil ölkəmizin yeni gənc­lər siyasətinin təməli qoyulub. Ölkəmizdə gənclər üçün yaradılan münbit şəraitdən faydalanan gənc­lərimiz bu gün Vətənimizin daha da inkişafı üçün yüksək nəticələr və məqsədlər uğrunda böyük əzmlə çalışır, öz bilik və bacarıqlarını artırırlar. Məruzəçi bildirib ki, ulu öndər Heydər Əliyev tərəfindən əsası qoyulan gənclər siyasətinin əsas məqsədi gənc nəslin fiziki, mənəvi-psixoloji cəhətdən sağlam formalaşmasından, istedadlı gənclərin üzə çıxarılması və onların ölkənin gələcəyinə töhfə verməsindən ibarətdir. Məhz bunun nəticəsidir ki, bu gün ölkə­mizdə, eyni zamanda muxtar respublikamızda yüksək intellektual səviyyəyə, milli düşüncəyə, vətənpərvərlik hissinə malik gənc­lər formalaşır. Azərbaycanın gələcəyi olan bu gəncliyin formalaşmasının əsasında Heydər Əliyev ideyalarına sədaqət dayanır.  
Sonra “Heydər Əliyev fenomeni” adlı filmə baxış olub.

Səbuhi HƏSƏNOV