Bu mövzuda Naxçıvan Qarnizonunun Zabitlər evində ümummilli lider Heydər Əliyevin anım günü ilə əlaqədar tədbir keçirilmişdir.
Tədbiri Naxçıvan Qarnizonunun zabiti, polkovnik-leytenant Mirqiyas Rüstəmov açmış, ümummilli lider Heydər Əliyevin əziz xatirəsi bir dəqiqəlik sükutla yad edilmişdir.
Sonra 705 saylı tam orta məktəbin direktoru Nazim Bayramovun, “N” hərbi hissənin zabiti, kapitan Anar Nəbiyevin, AMEA Naxçıvan Bölməsinin əməkdaşı, tarix üzrə fəlsəfə doktoru Asəf Orucovun məruzələri dinlənilmişdir. Qeyd olunmuşdur ki, ümummilli liderimiz Heydər Əliyevin xalqımız qarşısında çoxsaylı xidmətləri sırasında müstəqil Azərbaycanın Silahlı Qüvvələrinin yaradılması, möhkəmləndirilməsi, döyüş hazırlığının yüksəldilməsi mühüm əhəmiyyət daşıyır. Milli Ordumuzun yaradılmasına məhz ulu öndərimizin rəhbərliyi ilə Naxçıvandan başlanmışdır.
1993-cü ildə ümummilli liderimiz Heydər Əliyevin Azərbaycanda yenidən siyasi hakimiyyətə qayıdışından sonra ordu quruculuğu sahəsində ardıcıl və məqsədyönlü tədbirlərin həyata keçirilməsinə başlanılmış, qısa müddətdə vahid komandanlığa tabe olan nizami ordu formalaşdırılmışdır.
Ulu öndər Heydər Əliyevin ordu quruculuğu sahəsində həyata keçirdiyi tədbirlər bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Ölkəmizin dinamik inkişafı Silahlı Qüvvələrin büdcəsinin artması və nəticə etibarilə, ordumuzun güclənməsi ilə müşayiət olunur. Azərbaycan Prezidenti, Ali Baş Komandan İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlmiş, maddi-texniki bazası möhkəmləndirilmiş, hərbçilərin sosial vəziyyətinin yaxşılaşdırılması istiqamətində mühüm addımlar atılmışdır. Milli Ordumuz günü-gündən daha da güclənir. Müdafiə sənayesi potensialının artırılması istiqamətində atılan addımlar ordumuzun gücünə güc qatır.
Bildirilmişdir ki, bu gün Azərbaycanın qüdrətli və nizami orduya malik olması məhz ümummilli lider Heydər Əliyevin gərgin zəhmətinin bəhrəsidir.
Sonra tədbir iştirakçıları “Ulu öndər Heydər Əliyev və Azərbaycan Ordusu” adlı sənədli filmə baxmışlar.
Səbuhi HƏSƏNOV
