Dekabrın 9-da Azərbaycan Respublikasının Türkiyənin Qars şəhərindəki Baş Konsulluğunda ümummilli lider Heydər Əliyevin xatirəsinə həsr olunmuş tədbir keçirilmişdir.
Əvvəlcə mərasim iştirakçıları ümummilli liderimiz Heydər Əliyevin Qars şəhərinin Ərzurum küçəsindəki abidəsini ziyarət etmiş, abidə önünə gül dəstələri qoymuşlar.
Konsulluğun konfrans zalında davam etdirilən mərasimdə ümummilli liderin xatirəsi bir dəqiqəlik sükutla yad edildikdən sonra Azərbaycanın Qarsdakı Baş konsulu Ayxan Süleymanov çıxış edərək demişdir ki, müstəqil Azərbaycan dövlətinin memarı və qurucusu, ulu öndər Heydər Əliyevin həyata keçirdiyi siyasi xətti ölkəmizin hərtərəfli inkişafına, əhalinin sosial-rifah halının yüksəldilməsinə səbəb olmuşdur. Bu gün Azərbaycan Respublikası dahi şəxsiyyətin müəyyənləşdirdiyi yolla gedərək daha da inkişaf edir, beynəlxalq aləmdə öz nüfuzunu artırır. Artıq Azərbaycan dünyada söz sahibi olan bir dövlətə çevrilmişdir.

Azərbaycan-Türkiyə münasibətlərinin inkişafında həyata keçirilən beynəlxalq miqyaslı enerji və nəqliyyat layihələrinin əhəmiyyətini vurğulayan Baş konsul bildirmişdir ki, bütün bunların əsası ümummilli liderimiz Heydər Əliyev tərəfindən qoyulmuşdur. Bu gün ulu öndərin siyasi xəttinin ölkə Prezidenti cənab İlham Əliyev tərəfindən uğurla davam etdirilməsi ikitərəfli münasibətləri yeni inkişaf mərhələsinə yüksəltmişdir.  
Tədbirdə digər çıxış edənlər də Azərbaycan və Türkiyə arasındakı əlaqələrin inkişafında ulu öndər Heydər Əliyevin xidmətlərindən  danışmışlar.
Sonra Qars Qafqaz və Ardahan universitetlərinin tələbələri arasında keçirilmiş “Heydər Əliyev və Türkiyə” mövzusundakı inşa yazı müsabiqəsinin qaliblərinə mükafatlar təqdim olunmuşdur.
Tədbir iştirakçıları ulu öndər Heydər Əliyevin həyat yolundan və çoxşaxəli siyasi fəaliyyətindən bəhs edən “Dahi şəxsiyyət – Heydər Əliyev” adlı sənədli filmə baxmış, kitab və jurnallarla tanış olmuş, ehsan süfrəsi açılmışdır.
Mərasimdə Qars valisi Eyyup Təpə, Qars Qafqaz Universitetinin rektoru Sami Özcan, Ədalət və İnkişaf Partiyasının Qars vilayət rəhbəri, ziyalılar və ictimaiyyətin nümayəndələri iştirak etmiş, tədbir kütləvi informasiya vasitələrində ətraflı işıqlandırılmışdır.

“Şərq qapısı”