İsveçrə Konfederasiyasının Azərbaycandakı fövqəladə və səlahiyyətli səfiri Paskal Abişer Naxçıvan Muxtar Respublikasına səfəri çərçivəsində Naxçıvan Dövlət Universitetində də olmuşdur. Universitetlə tanışlıq zamanı qonağa universitetin strukturu, maddi-texniki bazası, professor-müəllim heyəti və tələbə kontingenti, tədris olunan ixtisaslar barədə ətraflı məlumat verilmişdir.

Universitetin rektoru, professor Saleh Məhərrəmov bildirmişdir ki, Azərbaycanda, o cümlədən Naxçıvan Muxtar Respublikasında elmin və təhsilin inkişafı, dünya təhsil sisteminə inteqrasiya, beynəlxalq təcrübə mübadiləsi daim diqqət mərkəzindədir.  Naxçıvan Dövlət Universiteti 2012-2013-cü tədris ili üçün Azərbaycanın ali və orta ixtisas təhsili müəssisələrinə tələbə qəbulunun nəticələrinə əsasən, TQDK-nın tərtib etdiyi ali təhsil müəssisələrinin reytinq cədvəlində yeddinci yerdə dayanır. Dünyanın tanınmış 80 ali məktəbi ilə beynəlxalq əməkdaşlığa malik olan bu ali məktəbdə 5000-dən çox tələbə, o cümlədən 12 ölkənin 300 nəfərdən çox vətəndaşı ali təhsil alır. Universitet bir çox beynəlxalq layihələrdə uğurla təmsil olunur.

Tələbə mobilliyinin artırılması nəticəsində universitetin bakalavr və doktorantları öz təhsillərini müxtəlif ölkələrin nüfuzlu universitetlərində davam etdirirlər.
Paskal Abişer Naxçıvana ilk səfəri, buradakı yüksək təhsil infrastrukturu barədə təəssüratlarını bölüşmüş, Azərbaycan ilə İsveçrə arasında ikitərəfli münasibətlərin sürətli və uğurlu inkişafında elm və təhsil sahəsində əməkdaşlığın əhəmiyyətini vurğulamışdır. Diplomat İsveçrədəki təhsil sistemi haqqında məlumat verərək bildirmişdir ki, İsveçrə universitetləri öz reytinqinə görə dünyanın ən qabaqcıl universitetləri sırasındadır. Beynəlxalq universitetlər kimi fəaliyyət göstərən və əksər məşhur Avropa universitetləri ilə əməkdaşlığa malik olan İsveçrə ali məktəblərinin Naxçıvan Dövlət Universiteti ilə tərəfdaşlığı da birgə tərəqqi baxımından mühüm rol oynayacaq.
Sonra tələbələrlə görüş keçirilmişdir.
Dünən səfir muxtar respublikanın bir neçə emal və istehsal müəssisəsinin fəaliyyəti, Naxçıvanın turizm obyektləri ilə tanış olmuşdur.

Xəbərlər şöbəsi