Hər bir insan dünyaya göz açdıqda ilk olaraq anasını gördüyü kimi, ilk qədəmlərini də Vətən torpağında atır. Elə Vətən sevgisinin hərarətini də o zaman duyur. Vətən sevgisi insanın qəlbinə hakim kəsilən, ana qədər müqəddəs bir hissdir. Tarixən Vətənimizin ərazisi dəfələrlə qəsbkarların hücumlarına məruz qalmışdır. Bunun nəticəsdir ki, torpaqlarımızın bir hissəsi, Dağlıq Qarabağ kimi dilbər güşəmiz ermənilərin əlinə keçmişdir. Bütün bunlar o zamankı rəhbərlərin yarıtmaz siyasəti nəticəsində baş vermişdir. Qürur hissi ilə deyə bilərik ki, bu gün isə artıq güclü dövlətimiz və sərhədlərimizi qoruyan güclü ordumuz var. Əgər vətənimizin sərhədlərini qoruyan güclü ordumuz varsa, dövlətimiz çox şeyə qadirdir. Əlbəttə Vətən sərhəddən başlayır.
Məlum olduğu kimi sentyabrın 27-də saat 6:00 radələrindən başlayaraq Ermənistan silahlı qüvvələri genişmiqyaslı təxribat törədərək, cəbhəboyu zonada yerləşən Azərbaycan Ordusunun mövqelərini iriçaplı silahlar, minaatanlar və müxtəlif çaplı artillerya qurğularından intensiv atəşə tutub.
Azərbaycan ordusu tərəfindən isə düşmənə layiqli cavab verilib. Belə ki, dünən Füzuli rayonunun Qaraxanbəyli, Qarvənd, Kənd Horadiz, Yuxarı Əbdürrəhmanlı, Aşağı Əbdürrəhmanlı və Cəbrayıl rayonunun Böyük Mərcanlı, Nüzgar və Murovdağ zirvəsi düşməndən azad edilib.Bu saata olan məlumata görə isə Talış kəndi ətrafındakı bir neçə əlverişli yüksəklik işğalçı qüvvələrdən təmizlənib, düşmən xeyli itki verib.Ermənistan silahlı qüvvələrindən azad edilən yüksəkliklərdən və əlverişli mövqelərdən hərəkətə keçən Azərbaycan Ordusunun bölmələri əldə olunmuş müvəffəqiyyəti artırmaq məqsədilə əks-hücum əməliyyatlarını davam etdirməkdədir. Ermənistanın hərbi təxribatlarına layiqli cavab verilir, sarsıdıcı zərbələr vurulur.
Ordumuzun gücü-qüdrəti, yenilməzliyi düşmənə bir daha nümayiş etdirildi. Silahlı Qüvvələrimizin xalqımızın nicat yerinə, qürur mənbəyinə çevrildiyi bir daha tədiqləndi. Sevincimizi, qələbəmizi, bu yüksəlişimizi içimizə sığdıra bilmirik… Azərbaycan ordusuna da elə bu cür QƏLƏBƏ yaraşırdı. Dünəndən başlayaraq əldə etdiyimiz uğurlar xalqımızın zəfəridir. Cənab Prezidentimiz, Ali Baş Komandanın verdiyi əmr və tapşırıqlarla Qələbəyə gəlib çatacağımıza 30 iilik həsrətimizə son qoyulacağına inanırıq. Bunun üçün aylar-illər deyil artıq günlər kifayət edəcək. Doğrudan da işğal olunmuş torpaqları azad etmək üçün Azərbaycan ordusuna bir neçə gün kifayət edərmiş. Çünki sadəcə bir gün ərzində neçə ərazimiz düşməndən azad edildi. Üçrəngli bayrağımızın həmin torpaqlarda dalğalancağı günü gözləyirik.
Bu zəfər, bu qələbə yurddaşlarımızın sabaha olan inamını,ümidini daha da yüksəltdi. Azərbaycan ordusu qələbə əzmindədir. QƏLƏBƏ Azərbaycanındır. QƏLƏBƏ bizimdir. Çünki haqq bizimlədir. Azərbaycan Respublikasının Prezidenti İlham Əliyev xalqa müraciətində də dediyi kimi: “Bu işğala son qoyulmalıdır və qoyulacaq. Biz haqq yolundayıq. Bizim işimiz haqq işidir. Biz zəfər çalacağıq. Qarabağ bizimdir, Qarabağ Azərbaycanındır”.
Bəli bu torpaqlar bizim xalqa məxsusdur. Biz kiminsə torpağını ələ keçirmirik, doğma torpaqlarımızı məkirli düşmandan azad edirik. Bu torpaqlarda zəfər çalacağımız gün qarşıdadır. Ölkə başçısı cənab İlham Əliyevin müdrik siyasəti, rəşadətli ordumuzun qüdrəti, xalqımızın əzmi və Azərbaycana dəstək olan dost ölkələrin birliyi sayəsində, inanırıq ki, Şəhid qanı ilə suvarılmış müqəddəs torpaqlarımız tez bir zamanda düşmən əsarətindən azad oluncaq və şanlı bayrağımız Qarabağda dalğalanacaq. Biz əminik ki, Vətənpərvərlik ruhu ilə silahlanmış Azərbaycan əsgərinin qarşısında bütün silahlara sarılmış düşmən tab gətirə bilməz.Tanrım ordumuzu qorusun. Dualarımız sizinlədir Azərbaycan əsgəri!!!
Nuray ƏSGƏROVA
