Salam, hörmətli redaksiya!
Bu məktubu sizə Naxçıvan şəhərindən yazıram. Hamımıza məlum olduğu kimi, muxtar respublikamızda böyük tikinti-quruculuq işləri aparılır, yeni binalar tikilir, gözəl parklar salınır, küçələr abadlaşdırılır. Görülən işlər təkcə biz şəhər sakinlərinin deyil, bura gələn qonaqların da zövqünü oxşayır. Şəhərimizdə diqqət yetirilən sahələrdən biri də yaşayış binalarının əsaslı şəkildə yenidən qurulması və təmir olunmasıdır. Son illərdə paytaxt Naxçıvan şəhərində onlarla yaşayış binası təmir olunaraq, müasir memarlıq nümunələri ilə zənginləşdirilərək sakinlərin istifadəsinə verilib.

Hazırda yaşadığımız Naxçıvan şəhəri, Zəroş Həmzəyeva küçəsindəki 2 nömrəli yaşayış binası da bir müddət idi ki, əsaslı təmir olunurdu. Bina sovet dövründə tikildiyindən fasadı baxımsız vəziyyətə düşmüş, kommunikasiya xətləri bir neçə dəfə təmir olunsa da, tələblərə cavab vermirdi. Lakin burada aparılan təmir işləri nəticəsində binanın görkəmi xeyli dəyişmiş, dam örtüyü, işıq, qaz, su xətləri yenilənmiş, giriş qapıları yeniləri ilə əvəz olunmuşdur. Bundan əlavə, binanın ətrafı da abadlaşdırılmış, uşaqların, həm də böyüklərin istirahəti üçün lazımi şərait yaradılmışdır. Bütün bunlar bina sakinləri kimi bizi sevindirməyə bilməz. Bilirik ki, görülən bu işlərin əsasında sakinlərə böyük dövlət qayğısı dayanır. Biz də, öz növbəmizdə, dövlətimizə minnətdarlığımızı bildirir, qurulub-yaradılanları qorumaqla bu qayğıya əməli işimizlə cavab verməyə çalışacağıq.

Yusif MƏMMƏDOV
Naxçıvan şəhər sakini