Naxçıvan Muxtar Respublikası Həmkarlar İttifaqları Şurasında Ümumdünya Əməyin Mühafizəsi Günü ilə əlaqədar keçirilən tədbiri giriş sözü ilə şuranın sədri Sucaxan Novruzov açıb. Bildirib ki, bu gün ölkəmizdə davam etdirilən hüquqi-dünyəvi dövlət quruculuğu vətəndaşların hüquq və mənafelərinin ən yüksək səviyyədə təminatına xidmət edir. İnsanların hüquqlarının qorunması, əməyinin mühafizəsi, sağlam və təhlükəsiz iş şəraitinin təşkili dövlət siyasətinin əsas istiqamətlərindən biridir. Muxtar respublikamızda da işçilərin hüquqlarının qorunması və əməyinin mühafizəsi daim diqqət mərkəzində saxlanılır.
Qeyd olunub ki, istehsal və tikinti sektorunda əmək hüquqlarının qorunmasına və əməyin mühafizəsi qaydalarına əməl edilməsinə davamlı nəzarətin və maarifləndirici tədbirlərin həyata keçirilməsi nəticəsində muxtar respublikada istehsal qəzalarının sayı ötən illərlə müqayisədə xeyli azalıb, əmək qabiliyyətinin itirilməsi ilə nəticələnən bədbəxt hadisələrin sayı minimuma endirilib. Bu istiqamətdə həyata keçirilən tədbirlər istehsal, emal və tikinti sahələrində əmək məhsuldarlığının artmasına və hər bir işçinin əməyinin mühafizəsi mədəniyyətinin yüksəlməsinə səbəb olub.
Tədbirdə çıxış edənlər əməyin mühafizəsi sahəsində görülən işlərdən danışıblar.
Nail ƏSGƏROV
