Naxçıvan Dövlət Universitetində fəaliyyət göstərən Heydər Əliyev Universitetinin 222-ci məşğələsi keçirilib. “Ümummilli lider Heydər Əliyevin milli dövlətçilik ənənələri və varislik” mövzusuna həsr olunmuş məşğələni açan universitetin rektoru, AMEA-nın müxbir üzvü Saleh Məhərrəmov ulu öndərin memarı və qurucusu olduğu Azərbaycan Respublikasının müstəqilliyinin qorunub saxlanılmasındakı misilsiz xidmətlərindən danışıb, onun milli dövlətçilik konsepsiyasından bəhs edib.
Vurğulanıb ki, ölkəmizin müstəqilliyinin əsasları dahi şəxsiyyətin uzaqgörənliyi sayəsində hələ ötən əsrin 70-ci illərində qoyulub. Məhz həmin dövrdən başlayaraq elm, təhsil, mədəniyyət və digər sahələrin inkişafında ciddi nailiyyətlər əldə edilib, Azərbaycan dili rəsmi dövlət dili kimi təsbit olunub, milli kadrların hazırlanması üçün mühüm addımlar atılıb. Ümummilli liderin “İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm” sözlərini xatırladan rektor cənab İlham Əliyevin növbəti prezident seçkilərində də qalib gəlməsini Heydər Əliyev ideyalarının təntənəsi, xalqın bu ideyalara daim sadiq qalacağını təsdiqləyən amil olduğunu qeyd edib.

“O siyasi lider xoşbəxtdir ki, onun ­davamçısı, ideyalarını daha irəli aparacaq varisi vardır”, – deyən Azərbaycan tarixi kafedrasının müdiri, AMEA-nın müxbir üzvü Zəhmət Şahverdiyev çıxışında bildirib ki, ümummilli lider siyasi varislik prinsipi baxımından ­mükəmməldir, əbədiyaşardır.
Qeyd olunub ki, ümummilli lider Heydər Əliyevin milli dövlətçilik ənənələrinin, ­sosial-iqtisadi inkişaf strategiyasının uğurla davam etdirilməsi ölkənin çoxcəhətli siyasi­-iqtisadi inkişafını təmin edib. Bu inkişaf muxtar respublikanı da hərtərəfli tərəqqiyə qovuşdurub.
Sonda ümummilli liderin həyat və fəaliyyətindən bəhs edən “Heydər Əliyev – dahi şəxsiyyət” filmi nümayiş olunub.

Səadət ƏLİYEVA