Azərbaycan nümayəndə heyəti 26-29 mart tarixlərində Avropa Şurasının Yerli və Regional Hakimiyyətlər Konqresinin 34-cü sessiyasında iştirak etmişdir.
“Yerli və regional səviyyədə hüquqlara əsaslanan idarəetmə” devizi altında keçən sessiyanın gündəliyində qitənin bir sıra üzv-dövlətlərində yerli və regional seçkilərin müşahidəsi, bəzi dövlətlərin öhdəliklərinə əməl edilməsinə dair monitorinq missiyalarının hesabatları, regional referendumlar, demokratiyanın aləti kimi: gözləntilər və risklər, regional identiklik və milli dövlətlərin bütövlüyü, yerli və regional səviyyədə insan hüquqlarının müdafiəsi və bir sıra digər məsələlər müzakirə olunmuşdur. Sessiyanın işində Danimarkanın həmsədrliyi ilə bağlı hökumət üzvünün iştirakı ilə müzakirələr aparılmış, eyni zamanda AŞPA-nın sədri Mikele Nikoletin çıxış etmişdir.
Azərbaycan nümayəndə heyəti ayrı-ayrı məsələlərə dair müzakirələrdə iştirak etmişdir. Plenar sessiyanın martın 28-də keçirilən toplantısında “Regional referendumlar, demokratiyanın aləti kimi: gözləntilər və risklər” mövzusunda təşkil olunan müzakirələrdə Avropa Şurasının Qanun üzərindən demokratiya (Venesiya) Komissiyası katibinin müavini, Fransanın Milli Elmi Araşdırmalar Mərkəzinin (CNRS) direktoru və bir sıra Avropa regionlarının rəhbərlərinin məruzələri dinlənilmiş, məruzələr ətrafında müzakirələr olmuşdur.
Avropa Şurası Konqresində Azərbaycan nümayəndə heyətinin rəhbəri, Naxçıvan Muxtar Respublikası Ali Məclisinin deputatı Anar İbrahimov müzakirələrdə çıxış edərək bildirmişdir ki, referendumlar birbaşa demokratiyanın vacib alətidir. Lakin bu alətin geniş istifadəsi yüksək siyasi mədəniyyətin olmasını tələb edir. Son zamanlar Avropada bu sahədə bir sıra populist qərarların və addımların şahidi oluruq, tez-tez bu cür yalançı referendumlar, sadəcə, separatçı təşəbbüslərə hüquqi don geyindirilməsi üçün təşkil olunur. Biz bu riskləri mütləq nəzərə almalıyıq. Səlahiyyətlərin sərhədləri və ümummilli maraqlarla uzlaşma, hüquqi çərçivədən kənara çıxmamağa dayanan yanaşma – vahid yanaşma qəbul olunmalıdır.
Sessiya zamanı nümayəndə heyəti digər məsələlər barədə aparılan müzakirələrdə də yaxından iştirak etmişdir.
Yeni Azərbaycan Partiyası
Naxçıvan Muxtar Respublika Təşkilatının İcra Katibliyi
