Martın 6-da Naxçıvan Muxtar Respublikası Avtomobil Yolları Dövlət Agentliyinə, İnzibati İqtisadi Məhkəməyə, Şahbuz Rayon Məhkəməsinə, Maliyyə Nazirliyi yanında Qiymətli Metallara və Qiymətli Daşlara Nəzarət İdarəsinə, Ordubad Rayon Gigiyena və Epidemiologiya Mərkəzinə “NAZ-­Lifan-620”, Naxçıvan Muxtar Respublikası Dövlət Baytarlıq Xidmətinə “NAZ-Lifan-720” markalı xidməti avtomobillər, Şərur rayonuna isə “MAZ” markalı kommunal təyinatlı avtomobil və 30 tullantı konteyneri təqdim olunmuşdur.
Bu münasibətlə keçirilən tədbirdə Naxçıvan Muxtar Respublikası Ali Məclisi Sədrinin birinci müavini Azər Zeynalov çıxış edərək demişdir ki, muxtar respublikada dövlət qurumlarının fəaliyyəti üçün lazımi şərait yaradılır, yeni inzibati binalar tikilərək istifadəyə verilir, onların maddi-texniki bazası möhkəmləndirilir. Bu tədbirlərin həyata keçirilməsində əsas məqsəd əhaliyə göstərilən xidmətin səviyyəsini yüksəltməkdir. Bu gün 6 dövlət qurumuna yerli istehsal olan “NAZ-Lifan-620” və “NAZ-Lifan-720”markalı xidməti avtomobillərin verilməsi də bu istiqamətdə görülən işlərin davamıdır. Naxçıvan Avtomobil Zavodunun bu gün təqdim olunan “NAZ-Lifan-620” və “NAZ-Lifan-720” modelləri yüksək keyfiyyəti və rahatlığı ilə seçilir. Həmçinin bu gün Şərur rayonuna tullantıların toplanması və vaxtında daşınmasının təşkili məqsədilə “MAZ” markalı avtomaşın və 30 tullantı konteyneri təqdim olunur. Yeni xidməti avtomobillər idarə­etmədə işin keyfiyyətini daha da yüksəldəcək. Buna görə də dövlət qurumlarının əməkdaşları avtomobillərin düzgün istismarına fikir verməli, onlara vaxtında lazımi texniki qulluq göstərməlidirlər.
Naxçıvan Muxtar Respublikası İnzibati İqtisadi Məhkəməsinin sədri Hicran Muradov avtomobillərin təqdimatına görə Naxçıvan Muxtar Respublikası Ali Məclisinin Sədrinə kollektiv adından minnətdarlıq etmişdir.

“Şərq qapısı”