Şura iclasında 2017-ci ildə görülmüş işlər və qarşıda duran vəzifələr müzakirə edilib. Tədbiri təşkilatın sədri, Naxçıvan Muxtar Respublikası Ali Məclisinin deputatı Qadir İbrahimov açaraq məruzə edib.
Bildirilib ki, Yeni Azərbaycan Partiyası Culfa Rayon Təşkilatı 2017-ci ildə gənclərlə işi daim diqqət mərkəzində saxlayıb, təşkilatın Gənclər Birliyi Rayon Gənclər və İdman İdarəsi, Təhsil Şöbəsi ilə birlikdə müxtəlif tədbirlər keçirib. Çağırışçıların həqiqi hərbi xidmətə yola salınmasında təşkilatın Gənclər Birliyinin, Qadınlar Şurasının üzvləri fəallıq göstərib, idmanın inkişafına, yeniyetmə və gənclərin vətənpərvərlik tərbiyəsinə xüsusi diqqət yetirilib.
Qeyd olunub ki, ötən il də rayon təşkilatı üzvlərinin sayı artıb, keyfiyyət dəyişiklikləri baş verib, partiya intizamı gücləndirilib. Təşkilat tərəfindən İdarə Heyətinin və şuranın iclasları, toplantı və elmi-praktik konfranslar keçirilib.
Hazırda rayon təşkilatının 55 ərazi ilk təşkilatı 5 min 515 partiya üzvünü öz ətrafında birləşdirir. Onlardan 2 min 609 nəfərini qadınlar, 1658-ni isə gənclər təşkil edir. Ötən il partiya sıralarına 91 nəfər qəbul olunub.
Qadir İbrahimov vurğulayıb ki, cari ildə də rayon təşkilatı ərazi ilk təşkilatları ilə əlaqəni daha da gücləndirəcək, tələbkarlıq, təşəbbüskarlıq və yenilikçilik, yeni iş və metodlardan istifadə diqqətdə saxlanılacaqdır. 2018-ci il fevralın 7-də partiya üzvləri rayon təşkilatının yaranmasının 25 illik yubileyini qeyd edəcəklər.
Şura iclasında Yeni Azərbaycan Partiyası Rayon Təşkilatının Gənclər Birliyinin sədri Təbriz Hüseynzadə, Qadınlar Şurasının sədri Xanım Tağıyeva, Yaycı kənd ərazi ilk partiya təşkilatının sədri Vaqif Abdullayev, Bənəniyar kənd ərazi ilk partiya təşkilatının sədri Duvangir Əhmədov çıxış ediblər.
İclasda müzakirə edilən məsələ ilə əlaqədar qərar qəbul olunub.
Sonra İdarə Heyətinin yığıncağı keçirilib, təşkilatın Gənclər Birliyinin hesabatı dinlənilib, bir qrup gənc Yeni Azərbaycan Partiyası sıralarına qəbul edilib.
Hüseyn ŞƏKƏRƏLİYEV
