Culfa Rayon İcra Hakimiyyəti, rayon Gənclər və İdman İdarəsi, Yeni Azərbaycan Partiyası Culfa Rayon Təşkilatı Gənclər Birliyinin təşkilatçılığı ilə 31 dekabr – Dünya Azərbaycanlılarının Həmrəylik Günü və Yeni il bayramı münasibətilə rayonun ictimai həyatında, yaradıcılıq sahəsində fərqlənən istedadlı yeniyetmə və gənclərin mükafatlandırılması mərasimi keçirilib.
Tədbirdə çıxış edən rayon İcra Hakimiyyəti başçısının müavini Kəmalə Səfərova, rayon Gənclər və İdman İdarəsinin rəisi Ümüd Həsənli və Yeni Azərbaycan Partiyası Culfa Rayon Təşkilatı Gənclər Birliyinin sədri Təbriz Hüseynzadə çıxış edərək yeniyetmə və gənclərə göstərilən dövlət qayğısından, rayonun ictimai həyatında və yaradıcılıq sahəsində, aparılan məqsədyönlü tədbirlərdə gənclərimizin fəaliyyətlərindən danışıblar.
Çıxışlardan sonra rayon Mədəniyyət Evinin “Çeşmə” musiqi instrumental ansamblı, Culfa şəhərindəki körpələr evi-uşaq bağçasının “Körpə fidanlar” rəqs qrupunun ifasında musiqi nümunələri səsləndirilib. Sonra səhnəyə balacaların sevimlisi Şaxta baba və Qar qız dəvət edilib.
Tədbirdə Yeni Azərbaycan Partiyası Culfa Rayon Təşkilatı tərəfindən bir qrup gəncə Yeni Azərbaycan Partiyasının üzvlük vəsiqələri təqdim edilib. Sonda müxtəlif sahələrdə fərqlənən gənclər mükafatlandırılıb.
Analoji tədbir yerli icra hakimiyyətləri, gənclər və idman idarələri və Yeni Azərbaycan Partiyası rayon təşkilatları tərəfindən Ordubad, Şahbuz, Şərur, Sədərək, Babək və Kəngərli rayonlarında da keçirilib, fərqlənən gənclər təşkilatçılar tərəfindən mükafatlandırılıb.
Ceyhun MƏMMƏDOV
