Dünən Yeni Azərbaycan Partiyası Culfa Rayon Təşkilatının IX konfransı keçirilmişdir. Konfransı YAP Culfa Rayon Təşkilatının sədri Qadir İbrahimov açaraq hesabat məruzəsi ilə çıxış etmişdir.
Qeyd olunmuşdur ki, 7 fevral 1993-cü ildə xalqımızın ümummilli lideri Heydər Əliyevin iştirakı ilə təsis olunmuş Yeni Azərbaycan Partiyası Culfa Rayon Təşkilatının yarandığı vaxtdan bu günədək 8 konfransı keçirilmişdir. Ötən müddət ərzində partiya üzvlərinin sayı 1912-si gənclər, 2408-i qadınlar olmaqla, 5293 nəfərə, ərazi ilk təşkilatlarının sayı isə 90-a çatmışdır.
Vurğulanmışdır ki, bu ilin oktyabr ayında ölkəmizdə prezident seçkiləri keçiriləcəkdir. YAP-ın yeganə alternativsiz namizədi cənab İlham Əliyevdir. Artıq bir sıra ictimai qurumlar cənab İlham Əliyevin namizədliyini irəli sürmüşlər. Şübhə yoxdur ki, bütün demokratik seçkilərdə olduğu kimi, budəfəki seçkilərdə də Culfa seçiciləri Prezident İlham Əliyevə səs verəcəklər.
Sonra Yeni Azərbaycan Partiyasının V qurultayına nümayəndələr seçilmişdir.
* * *
Yeni Azərbaycan Partiyası Şahbuz Rayon Təşkilatının X konfransını giriş sözü ilə təşkilatın sədri, Naxçıvan Muxtar Respublikası Ali Məclisinin deputatı Rizvan Məmmədov açaraq məruzə edib. Qeyd olunub ki, Yeni Azərbaycan Partiyası Şahbuz Rayon Təşkilatının 1993-cü il mart ayının 13-də keçirilən təsis konfransında ümummilli liderimiz Heydər Əliyevin iştirakı, yeni yaradılan təşkilata tövsiyələrini verməsi bu gün qürurla xatırlanır. Partiya üzvləri öz fəaliyyətlərində ulu öndərə sədaqət və ehtiramlarını göstərir, Heydər Əliyev siyasi kursunun davamçısı, ölkə başçısı cənab İlham Əliyevin həyata keçirdiyi siyasəti ürəkdən dəstəkləyirlər.
Bildirilib ki, Yeni Azərbaycan Partiyasının uğurları getdikcə artır. Partiya əldə etdiyi bütün nailiyyətlərə görə bu nailiyyətlərin əsasını qoyan ulu öndərimizə və ümummilli liderimizin yolunun davamçısı Azərbaycan Respublikasının Prezidenti və Yeni Azərbaycan Partiyasının Sədri cənab İlham Əliyevə borcludur. Yeni Azərbaycan Partiyası Azərbaycan xalqını Heydər Əliyev ideyaları ətrafında sıx birləşdirən, onları bu ideyalar ətrafında səfərbər edən siyasi-ideoloji həyat məktəbidir.
Konfransda Yeni Azərbaycan Partiyasının V qurultayına nümayəndələr seçilib.
Xəbərlər şöbəsi
