Böyük təşkilatlanma yolu keçən Əlahiddə Ümumqoşun Ordunun tankçıları verilən tapşırıqları vaxtında və dəqiq yerinə yetirirlər. Təlimlərdə tankçılarımızın təyin olunmuş hədəfləri ilk atəşlə məhv etmələri onların döyüş hazırlığının yüksək səviyyədə olmasından xəbər verir. Onlar beynəlxalq tədbirlərdə də iştirak edərək uğurlu nəticələrə imza atırlar. 

Bu il iyul ayının 29-dan avqustun 12-dək Rusiya Federasiyasının Alabino təlim mərkəzində keçirilən Beynəlxalq Ordu Oyunları çərçivəsində 19 ölkədən 57 tank heyətinin iştirak etdiyi “Tank biatlonu” müsabiqəsində Azərbaycan tankçıları uğurlu nəticə göstəriblər. Yarışda Əlahiddə Ümumqoşun Ordunun tankçıları da iştirak edib. Azərbaycan Silahlı Qüvvələrini təmsil edən 3 tank heyəti sırasında Əlahiddə Ümumqoşun Ordunun tankçılarından gizir Əlikərəm Bədəlov və gizir Ceyhun Şıxzadayev də iştirak edib. Azərbaycan tankçıları hədəfləri ustalıqla vurub, manevrləri bacarıqla keçib, yüksək idarəçilik qabiliyyəti nümayiş etdirərək 19 ölkə arasında 5-ci yerdə qərarlaşıblar.
“Tank biatlonu” müsabiqəsində yüksək peşəkarlıq göstərən Əlahiddə Ümumqoşun Ordunun tankçıları gizir Əlikərəm Bədəlov yarışa cəlb olunan şəxsi heyət arasında ən yaxşı tank komandiri, gizir Ceyhun Şıxzadayev ən yaxşı tuşlayıcı-operatoru seçilib. Mükafatlandırma mərasimində yarışın rəhbərliyi tərəfindən gizir Əlikərəm Bədəlova dostluq medalı və qiymətli hədiyyə təqdim edilib.

Qeyd edək ki, gizir Əlikərəm Bədəlov 1992-ci ildə Hacıqabul rayonunda anadan olub. 2011-ci ildə Şirvan Dövlət İqtisadiyyat və Humanitar Kollecini bitirib. 2011-2013-cü illərdə əsgər kimi həqiqi hərbi xidmət keçən Əlikərəm tank bölməsində tuşlayıcı vəzifəsində xidmət edib. Həmin vaxtdan Əlikərəm Bədəlovda tankçı ixtisasına maraq yaranıb və hərbi xidmətdən sonra yenidən ordu sıralarına qayıtmaq istəyən bu gənc Silahlı Qüvvələrin Təlim və Tədris Mərkəzində gizir hazırlığı kursuna cəlb edilib. Tankçı ixtisasına yiyələnən gizir Əlikərəm Bədəlov 2013-cü ildən Əlahiddə Ümumqoşun Orduda tank komandiri vəzifəsində xidmət edir. İstər əsgər kimi, istərsə də ki, gizir kimi xidməti dövründə həmişə nümunəvi xidməti ilə valideynlərinə və komandirlərinə başucalığı gətirən Əlikərəm Bədəlov qarşıya qoyulmuş tapşırıqları vaxtında və dəqiq yerinə yetirən döyüşçü kimi formalaşıb. Öz ixtisasını mükəmməl mənimsəyərək peşəkar tankçı kimi yetişən gizir Əlikərəm Bədəlov xidməti müddətində bir sıra uğurlara imza atıb. Onun sonuncu uğuru isə Beynəlxalq Ordu Oyunları çərçivəsində təşkil olunan “Tank biatlonu” müsabiqəsində olub.
Söhbət zamanı gizir Əlikərəm ­Bədəlov dedi: “Müasir tanklar ən yeni silahlarla təchiz edilmiş döyüş maşınlarıdır. Tankların möhkəm, davamlı zirehi, güclü dizel mühərrikləri, müasir idarəetmə cihazları vardır. Tank bölmələri uzaq məsafələrə sürətli yürüş etmək, düşmənin müdafiə xəttini yararaq yüksək templə hücum etmək imkanlarına malikdir. Bütün bunlar da tankçıları məğlubedilməz edir. Bizi yenilməz edən təkcə istifadəmizdə olan tanklar deyil, həm də keçirilən məşğələ və təlimlərdə qazandığımız yüksək mənəvi ruh, fiziki və döyüş hazırlığıdır. Beynəlxalq Ordu Oyunlarında uğur qazanmağımız aparılan məqsədyönlü işin, keçirilən təlimlərdə əldə etdiyimiz təcrübənin bəhrəsidir. Sevincli və qürurluyam”.
Digər tank komandiri gizir Ceyhun Şıxzadayev 1988-ci ildə Bakı şəhərində anadan olub. Tam orta məktəbi bitirdikdən sonra 2007-2009-cu illərdə əsgər kimi həqiqi hərbi xidmət keçib. Vətənə olan sevgisi və hərbi xidmətə böyük marağı onu gizir hazırlığı kursuna yazılmağa sövq edib. Silahlı Qüvvələrin Təlim və Tədris Mərkəzində gizir hazırlığı kursunu müvəffəqiyyətlə başa vurduqdan sonra 2010-cu ildən gizir kimi xidmətini Naxçıvan Muxtar Respublikasında davam etdirməkdədir. Xidməti dövründə müxtəlif təltiflərə layiq görülüb, o cümlədən “Azərbaycan Respublikası Silahlı Qüvvələrinin yaranmasının 95 illiyi” yubiley medalı ilə təltif edilib. Gizir Ceyhun Şıxzadayevin sonuncu nailiyyəti isə Beynəlxalq Ordu Oyunları çərçivəsində təşkil olunan “Tank biatlonu” müsabiqəsində olub. Həmin müsabiqədə ən yaxşı tuşlayıcı-operatoru adına layiq görülüb.
Gizir Ceyhun Şıxzadayevin dediklərindən: “Döyüşdə qələbə qazanmaq üçün döyüşçü öz silahını və döyüş texnikasını mükəmməl bilməli, onları həmişə döyüşə hazır vəziyyətdə saxlamalı və bacarıqla işlətməlidir. Buna görə də bütün döyüş tapşırıqlarını vaxtında və dəqiq yerinə yetirmək üçün bizə təhkim edilmiş silah və texnikanın sirlərinə yaxından bələd olur, onları saz vəziyyətdə saxlamağa çalışırıq. Nəticədə isə təlim və yarışlarda uğurla iştirak edirik. İstər döyüş atışlı taktiki təlimlərdə, istərsə də bir neçə gün əvvəl Rusiya Federasiyasında keçirilən Beynəlxalq Ordu Oyunları çərçivəsində təşkil olunan “Tank biatlonu” müsabiqəsində nailiyyət qazanmağımız döyüş hazırlığı planına uyğun olaraq keçirilən dərslərdə əldə etdiyimiz təcrübə sayəsində mümkün olub. Təbii ki, bütün bunlar bizi hərbi xidmətə daha da ruhlandırır”.
Ötən il keçirilən “Tank biatlonu” müsabiqəsində də gizir Əlikərəm Bədəlov və gizir Ceyhun Şıxzadayev iştirak edərək uğur qazanmışdılar. Həmçinin ötən il onlarla bərabər Əlahiddə Ümumqoşun Ordunun digər bir tankçısı müddətdən artıq həqiqi hərbi xidmət hərbi qulluqçusu, əsgər Tural Mərdanlı da iştirak etmişdi. İstər ötənilki yarışlarda istərsə də, builki yarışlarda tankçılarımız böyük uğura imza atıblar.
Onu da qeyd etmək yerinə düşər ki, Beynəlxalq Ordu Oyunlarında və bu yarışlar çərçivəsində təşkil olunan “Tank biatlonu” müsabiqəsində Azərbaycan Silahlı Qüvvələrinin nümayəndələri ötən ildən iştirak edirlər. Həm 2016-cı ildə ilk dəfə, həm də bu il ikinci dəfə iştirak etməyimizə baxmayaraq, hərbi qulluqçularımız ən yaxşı nəticə göstərənlər sırasında olurlar. İşğalçı erməni ordusunun nümayəndələrinin də iştirak etdiyi yarışlarda bizim hərbi qulluqçularımız düşməni hər dəfə üstələyir. “Tank biatlonu” müsabiqəsində bir neçə ölkənin tankçıları öz tankları ilə iştirak etsələr də, Azərbaycan tankçıları püşkatma yolu ilə onlara düşmüş tanklarla uğurlu nəticə göstərir, yüksək peşəkarlıq nümayiş etdirirlər. Deməli, beynəlxalq yarışlarda düşməndən qat-qat güclü olduğunu sübut edən tankçılarımız döyüş meydanında da düşməni məhv etməyə qadirdirlər.
Tankçılarımız döyüş hazırlığı planına uyğun olaraq keçirilən dərs, məşğələ və təlimlərdə fəal iştirak edərək yenilməz döyüşçü kimi formalaşır, yüksək mənəvi-psixoloji, fiziki və döyüş hazırlığına yiyələnirlər. Bu gün Əlahiddə Ümumqoşun Ordunun əsgərləri təkcə yarış və təlimlərdə deyil, real döyüşlərdə də zəfər çalmağa hazırdırlar.

Nəriman Nəcəfov