Naxçıvan Muxtar Respublikasında fəaliyyət göstərən ali təhsil müəssisələri tələbələrinin iştirakı ilə Duzdağ Fizioterapiya Mərkəzinə gedən yolun ətrafında 22 aprel – Beynəlxalq Yer Kürəsi Günü münasibətilə təmizlik aksiyası keçirilib.
Naxçıvan Muxtar Respublikası Ali Məclisinin Sədri yanında Gənclər Fondunun, Naxçıvan Muxtar Respublikasının Gənclər və İdman, Ekologiya və Təbii Sərvətlər nazirliklərinin, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin birgə təşkilatçılığı ilə keçirilən aksiyada 60 tələbə iştirak edib.
Tədbirdə Gənclər və İdman Nazirliyi Aparatının şöbə müdiri Nicat Babayev, Ekologiya və Təbii Sərvətlər Nazirliyi Aparatının şöbə müdiri Azər Məmmədov çıxış edərək bildiriblər ki, Beynəlxalq Yer Kürəsi Gününün yaranma tarixi XIX əsrin 40-cı illərinə təsadüf edir. Belə ki, o dövrdə Amerika Birləşmiş Ştatlarının Nebraska ştatının sakini Corc Morton tərəfindən yaşıllaşdırma gününün keçirilməsi təklif olunub. 1882-ci il aprelin 22-də ilk dəfə Nebraska ştatında Ağac Günü rəsmi olaraq bayram günü kimi qeyd olunub. 1970-ci ildən isə ekoloji fəallardan olan senator G.Nelsonun təklifinə əsasən ekoloji problemlərə, ətraf mühitin çirklənməsinə diqqəti cəlb etmək məqsədilə həmin günün adı dəyişdirilərək Yer Kürəsi Günü adlandırılıb.
Bildirilib ki, Beynəlxalq Yer Kürəsi Günü bu gün ölkəmizdə, o cümlədən Naxçıvan Muxtar Respublikasında qeyd olunur. Hər il aprelin 22-də muxtar respublikada Beynəlxalq Yer Kürəsi Gününün mahiyyətini özündə əks etdirən tədbirlər təşkil edilir, gənclərin həmin tədbirlərdə yaxından iştirakı təmin olunur. Bu istiqamətdə görülən işlərə gənclərin təmizlik aksiyalarını, təbiət guşələrinə ekskursiyalarını misal göstərmək olar. Aksiyanın keçirilməsində məqsəd gənclərin diqqətini ekoloji məsələlərə cəlb etməkdir.
Sonra tələbələrin iştirakı ilə təmizlik aksiyasına start verilib. Onlar yaşıllıq zolağındakı ağaclara aqrotexniki qulluq göstərib, ətrafda səliqə-sahman yaradıblar.
Daha sonra “Naxçıvanqala” Tarix-Memarlıq Muzey Kompleksi ilə tanış olan gənclər çay süfrəsi arxasında ekologiyanın mühafizəsində gənclərin rolu barədə diskussiyalar aparıblar.
Ceyhun Məmmədov
