Martın 5-də İran İslam Respublikasının Qərbi Azərbaycan Vilayətinin rəsmi şəxsləri və iş adamları əvvəlcə Naxçıvan Biznes Mərkəzində olmuş, nümayəndə heyətlərinin iştirakı ilə görüş keçirilmişdir. Sonra qonaqlar Naxçıvan Biznes Mərkəzinin sərgi salonunda nümayiş olunan məhsullara baxmış, onlara muxtar respublikanın sosial-iqtisadi inkişaf göstəriciləri haqqında məlumat verilmişdir.
Həmin gün Naxçıvan şəhərindəki Mərkəzi bazarda İranda istehsal edilən ərzaq məhsulları və əl işlərinin sərgi-satışının açılışı olmuşdur. Əvvəlcə “Qurani-Kərim”dən ayələr oxunmuşdur.
Naxçıvan Muxtar Respublikası Ali Məclisi Sədrinin birinci müavini Azər Zeynalov çıxış edərək tədbir iştirakçılarını və qonaqları Naxçıvan Muxtar Respublikası Ali Məclisinin Sədri adından salamlamış, sərginin açılışı münasibətilə onları təbrik etmişdir. Qeyd olunmuşdur ki, son illər nümayəndə heyətlərinin qarşılıqlı səfərləri, birgə görüşlərin, biznes forumların və sərgi satışların təşkili artıq ənənə halını almışdır. Bu da Azərbaycanın Naxçıvan Muxtar Respublikası ilə İran İslam Respublikasının yaxın vilayətləri arasında qarşılıqlı ticarət-iqtisadi əlaqələrin inkişafına təkan vermişdir.
Qeyd edilmişdir ki, ticarət-iqtisadi əlaqələrin genişləndirilməsində hər iki ölkənin sahibkarlarının xidmətləri vardır. Bu əlaqələr daha da inkişaf edəcəkdir. Çünki hər iki ölkə rəhbərinin əlaqələrin inkişafına göstərdikləri böyük dəstək buna geniş imkanlar yaradır.
Ali Məclis Sədrinin birinci müavini sərginin təşkilatçılarına təşəkkürünü bildirmiş və tədbir iştirakçılarını qarşıdan gələn Novruz bayramı münasibətilə təbrik etmişdir.
Tədbirdə İran İslam Respublikasının Naxçıvandakı Baş konsulu Mənsur Ayrom və Qərbi Azərbaycan Vilayəti valisinin iqtisadi məsələlər üzrə müavini Nadir Səfərzadə çıxış edərək Azərbaycanın Naxçıvan Muxtar Respublikası ilə İran İslam Respublikasının yaxın vilayətləri arasındakı əlaqələrin getdikcə daha da genişləndirilməsini yüksək qiymətləndirmişlər.
Sonra sərginin açılışını bildirən lent kəsilmişdir.
Sərgi martın 12-dək davam edəcəkdir.
“Şərq qapısı”
