Naxçıvan Muxtar Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranları Şurasının sədri Qara Abbas oğlu Fərzəliyev 2017-ci il yanvarın 2-də ömrünün 94-cü ilində vəfat etmişdir.
Qara Fərzəliyev 1923-cü il oktyabrın 22-də Naxçıvan şəhərində anadan olmuş, 1941-ci ildə Naxçıvan şəhər 2 nömrəli tam orta məktəbi bitirdikdən sonra hərbi xidmətə çağırılmışdır. O, İkinci Dünya müharibəsi illərində 402-ci Azərbaycan diviziyasının 678 saylı istehkamçı batalyonunda, 77-ci Azərbaycan diviziyasının 105-ci atıcı polkunda Krasnodar və Rostov vilayətlərindəki şəhər və kəndlərin alman faşistlərindən azad edilməsi uğrunda gedən döyüşlərdə fəal iştirak etmişdir. 1944-cü ildə kiçik leytenant rütbəsi alan Qara Fərzəliyev bundan sonra döyüş yolunu 417-ci diviziyanın 5-ci bölüyünün taqım komandiri kimi davam etdirmiş, Baltikyanı respublikaların azad edilməsi uğrunda döyüşlərdə fəal iştirak etmişdir.
Göstərdiyi şücaətlərə görə Qara Fərzəliyev “Qırmızı Bayraq” ordeni və müxtəlif medallarla təltif edilmişdir.
Qara Fərzəliyev müharibədən sonra 1957-ci ilədək Uralda, Şərqi Sibirdə, Stavropol və İrkutsk vilayətlərində rota komandiri, siyasi işlər üzrə müavin, 1957-1961-ci illərdə Naxçıvan Şəhər Mülki Müdafiə İdarəsinin rəisi, 1961-1995-ci illərdə Naxçıvan Mülki Müdafiə Qərargahında məxfi işlər üzrə rəis, 1995-ci ildən isə Naxçıvan Muxtar Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranları Şurasının sədri vəzifəsində çalışmışdır.
Qara Fərzəliyev istər hərbi xidmət, istərsə də sonrakı fəaliyyəti dövründə daim öz təşəbbüskarlığı ilə seçilmiş, ictimai işlərdə fəallıq göstərmiş, gənc nəslin hərbi-vətənpərvərlik tərbiyəsində yaxından iştirak etmişdir.
Böyük Vətən Müharibəsi veteranı Qara Fərzəliyevin xatirəsi unudulmayacaqdır.
Naxçıvan Muxtar Respublikasının Ali Məclisi
Naxçıvan Muxtar Respublikasının Nazirlər Kabineti
Naxçıvan Şəhər İcra Hakimiyyəti
