Xəbər verdiyimiz kimi, iyunun 21-dən 23-dək İsrail Dövlətinin Azərbaycandakı fövqəladə və səlahiyyətli səfiri Dan Stav Naxçıvan Muxtar Respublikasına səfər edib. Səfər çərçivəsində diplomat muxtar respublikamızın istehsal, təhsil, mədəniyyət və səhiyyə müəssisələri, tarixi abidələri, gəzməli-görməli yerləri ilə tanış olub. İsrail səfiri ilə söhbətimiz də məhz səfərinin məqsədi və səfər təəssüratları barədə oldu. Dan Stav əvvəlcə Naxçıvan Muxtar Respublikasına səfərinin məqsədi barədə danışaraq dedi:
– Bu, mənim Naxçıvan Muxtar Respublikasına ilk səfərimdir. Səfərimin məqsədi Azərbaycan ilə İsrail arasında münasibətlərin inkişafı fonunda Azərbaycanın Naxçıvan Muxtar Respublikası ilə də əlaqələrin genişləndirilməsidir. Burada bir sıra görüşlər keçirdim və əməkdaşlığın inkişaf etdirilməsinin yollarını müzakirə etdik. Bunu vurğulamaq istərdim ki, Naxçıvan Muxtar Respublikası ilə İsrail Dövləti arasında əlaqələrin inkişafı üçün geniş imkanlar mövcuddur. Xüsusən turizm, kənd təsərrüfatı, səhiyyə sahələrində əlaqələr yaradıla bilər. Biz əməkdaşlığın yaradılmasını və inkişaf etdirilməsini səbirsizliklə gözləyirik. Ümid edirəm ki, muxtar respublikaya səfərim qarşılıqlı, faydalı əlaqələrin inkişafına töhfə verəcəkdir.
– Siz muxtar respublikanın istehsal, səhiyyə, mədəniyyət, təhsil müəssisələri, gəzməli-görməli yerləri, tarixi abidələri ilə də tanış oldunuz. Muxtar respublikadan hansı təəssüratlarla ayrılırsınız?
– Naxçıvan Muxtar Respublikasında gördüklərim mənə çox böyük təəssüratlar bəxş etdi. Xüsusən Naxçıvan şəhərinin təmizliyi, gözəlliyi məni valeh etdi. Qeyd etdiyiniz kimi, biz muxtar respublikanın bir sıra turizm məkanlarında olduq. Həqiqətən də, muxtar respublika böyük turizm potensialına malikdir. Biz istərdik ki, bu sahədə də əlaqələri genişləndirək və İsraildən Naxçıvana turistlər gəlsin, bu gözəl diyarı tanısınlar.
Ümumi qənaətim belədir ki, muxtar respublika həm kənd təsərrüfatı, həm də sənaye sahələri baxımından xeyli inkişaf edib. Bu sahələrdə xeyli iş görülüb. Burada keyfiyyətli və ekoloji cəhətdən təmiz kənd təsərrüfatı məhsulları diqqətimi cəlb etdi.
Rauf Əliyev
