Mart ayının 22-dən 24-dək Bakı şəhərində budo döyüş növləri üzrə Azərbaycan çempionatı keçirilib. Budo döyüş növlərinin semi-kontakt və full-kontakt növləri üzrə 350-dən artıq idmançının birincilik uğrunda mübarizə apardığı çempionatda muxtar respublikamızın idmançıları Həsən Əliyev ilə Elvin Əhmədov da iştirak edib. Naxçıvan Muxtar Respublikası Şərq Döyüş Sənəti Federasiyasının yetirməsi olan Həsən Əliyev bu yarışda 90 kiloqram çəki dərəcəsində mübarizə aparıb. Dünya və beynəlxalq səviyyəli yarışların təcrübəsinə yetərincə sahib olan həmyerlimiz çempionatda qalib olub. 90+ kiloqram çəki dərəcəsində finala qədər bütün görüşlərini qələbə ilə başa vuran digər idmançımız Elvin Əhmədov həlledici görüşdə də rəqibini məğlub edərək Azərbaycan çempionu olub. Qalib idmançılarımız aprelin 5-dən 9-dək Moldovanın Kişinyov şəhərində keçiriləcək budo döyüş növləri üzrə Avropa çempionatına vəsiqə əldə ediblər.

Naxçıvan Muxtar Respublikası
 Gənclər və İdman Nazirliyinin mətbuat xidməti