Gənclərin hərbi vətənpərvərlik tərbiyəsini gücləndirmək məqsədilə Babək rayonunda “Şahin” hərbi-idman oyunu üzrə rayon birinciliyi keçirilmişdir. Yarışın açılış mərasimində çıxış edənlər yarışın əsas məqsədinin yetişməkdə olan gənc nəslin hərbi vətənpərvərlik tərbiyəsinə diqqət və qayğını daha da artırmaq, “gənclərin çağırışaqədərki hazırlığı” fənninin tədrisi səviyyəsini yüksəltmək, məktəblilərin ordu sıralarına hazırlığını gücləndirməkdən ibarət olduğunu vurğulamışlar. Sonra rayonun bütün orta ümumtəhsil məktəblərinin komandalarının qatıldığı kütləvi hərbi-idman yarışına start verilmişdir. Şagirdlər bacarıqlarını nümayiş etdirmişlər. Yarışda 12 orta məktəbin X-XI sinif şagirdləri sıra hazırlığı, maneələri dəfetmə, avtomatın sökülüb-yığılması, patronun darağa doldurulub-boşaldılması, 100 metr məsafəyə qaçış, turnikdə dartınma, mülki müdafiə hazırlığı, sanitarların yarışı, estafet şəklində maneələri dəfetmə və digər növlər üzrə qüvvələrini sınamışlar. Nehrəm kəndindəki 2 nömrəli tam orta məktəbin komandası birinci, Şıxmahmud kənd tam orta məktəbinin şagirdləri ikinci, Nehrəm kəndindəki 3 nömrəli tam orta məktəbin “Şahin”ləri üçüncü yerləri tutmuşlar. Birinci yeri tutan komanda “Şahin” hərbi-idman oyunlarının muxtar respublika üzrə zona yarışında iştirak edəcəkdir.
Bununla da, “Cəsurlar” hərbi-idman və turizm oyunu ilə “Şahin” hərbi-idman oyununun rayon mərhələləri başa çatmışdır.

Naxçıvan Muxtar Respublikası
Gənclər və İdman Nazirliyinin mətbuat xidməti