Naxçıvan Muxtar Respublikasında fəaliyyət göstərən ali və orta ixtisas təhsili müəssisələrinin qız tələbələri arasında 10-17 noyabr Beynəlxalq Tələbə-Gənclər Həftəsinə həsr olunmuş badminton üzrə birincilik keçirilib.
Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi, Naxçıvan Muxtar Respublikası Ali Məclisinin Sədri yanında Gənclər Fondu, Naxçıvan Muxtar Respublikası Gənclər və İdman Nazirliyi, ali və orta ixtisas müəssisələrinin təşkilatçılığı ilə keçirilən yarış Naxçıvan Dövlət Universitetinin (NDU) İdman Kompleksində baş tutub.
20-yə yaxın idmançının birincilik uğrunda mübarizə aparığı yarışda NDU-nun yetirmələri ilk üç pillədə qərarlaşıblar. Belə ki, Zərövşən Yusifəliyeva bütün rəqiblərini məğlub edərək qalib adını qazanıb. O, həlledici görüşdə Ezgi Ceylanı məğlub edib. Üçüncü yerə isə universitetin digər tələbəsi Sibel Yıldız çıxıb.
* * *
10-17 noyabr Beynəlxalq Tələbə-Gənclər Həftəsinə həsr olunmuş Naxçıvan Muxtar Respublikasında fəaliyyət göstərən ali və orta ixtisas təhsili müəssisələrinin oğlan və qız tələbələri arasında şahmat turniri təşkil edilib.
60-a yaxın zəka sahibinin mübarizə apardığı turnir olimpiya sistemi üzrə keçirilib. Oğlanların mübarizəsində Naxçıvan Dövlət Universitetinin tələbələrindən Toğrul Həsənzadə bütün rəqiblərini qabaqlayaraq turnirin qalibi olub, Mehdi Mehdizadə və Hüseyn Həsənov isə digər iki pillədə qərarlaşıblar.
Qızların mübarizəsində isə Naxçıvan Dövlət Universitetinin tələbəsi Röya Müslümzadə birinci yerə layiq görülüb. Naxçıvan Dövlət Texniki Kollecinin tələbəsi Zəhra Quliyeva ikinci, Naxçıvan Tibb Kollecinin tələbəsi Şərqiyə Zərgərli isə üçüncü olub.
Ceyhun Məmmədov
