Şərurda...
Rayon Gənclər və İdman İdarəsinin və Təhsil Şöbəsinin təşkilatçılığı ilə yeniyetmələr arasında sərbəst güləş üzrə rayon birinciliyi keçirilib. Birincilikdə 14 çəki dərəcəsində 56 pəhləvan qüvvəsini sınayıb. Qalib idmançılar təşkilatçılar tərəfindən diplom və medallarla təltif olunublar.
Şərur Rayon Gənclər və İdman İdarəsinin, Səfərbərlik və Hərbi Xidmətə Çağırış üzrə Dövlət Xidmətinin Şərur Rayon İdarəsinin və Təhsil Şöbəsinin birgə təşkilatçılığı ilə məktəblilərin “Şahin” hərbi-idman oyunu baş tutub. Yarışda 19 ümumtəhsil məktəbindən 266 şagird iştirak edib. Daha üstün oyun sərgiləyən Danyeri kənd tam orta məktəbinin komandası qalib olub. İbadulla kənd tam orta məktəbinin komandası ikinci, Dəmirçi kənd tam orta məktəbinin komandası isə üçüncü yerlərə layiq görülüblər.
Qaliblərə təşkilatçılar tərəfindən diplom və hədiyyələr təqdim olunub.
...və Şahbuzda
Rayon Gənclər və İdman İdarəsi ilə Təhsil Şöbəsinin birgə təşkil etdiyi rayon ümumtəhsil məktəblərinin şagirdləri arasında şahmat üzrə rayon birinciliyinə yekun vurulub. 100-dən artıq zəka sahibinin iştirak etdiyi birinciliyin finalında 18 şahmatçı İsveçrə sistemi ilə mübarizə aparıb. Nəticəyə əsasən, Umud Məhərrəmli, Mətləb Məhərrəmli və Tuncay Cabbarov ilk üç yerin sahibi olublar.
Həmçinin Şahbuz və Culfa Rayon Gənclər və İdman idarələrinin, Təhsil şöbələrinin birgə təşkilatçılığı ilə rayonların məktəblilərdən ibarət voleybol komandaları arasında yoldaşlıq görüşü keçirilib. Şahbuz şəhər 1 nömrəli tam orta məktəbin idman zalında keçirilən yarışda Şahbuz rayonunun voleybolçuları culfalı həmkarlarını 2:1 hesabı ilə məğlub ediblər.
Ceyhun Məmmədov
