Artıq üç gündür ki, “Bakı-2015” Avropa Oyunlarının tanıtımı məqsədilə Naxçıvan Muxtar Respublikasında olan “Bakı-2015” Avropa Oyunlarının Əməliyyat Komitəsinin üzvləri dünən növbəti tanıtım tədbirini həyata keçirib. Bu dəfə komitə üzvləri muxtar respublikada fəaliyyət göstərən idman federasiyalarının idmançıları və müəllimləri ilə görüş təşkil ediblər. Naxçıvan şəhərindəki İlham Əliyev adına Olimpiya-İdman Kompleksində keçirilən tədbirdə əvvəlcə Avropa Oyunlarına həsr edilmiş videoçarx nümayiş etdirilib və tədbir iştirakçılarına “Bakı-2015” Avropa Oyunları haqqında geniş məlumat verilib.
Sonra ənənəvi olaraq Avropa Oyunlarına daxil edilən idman növlərinin muxtar respublika gəncləri arasında populyarlığı haqqında sorğu təşkil edilib. Sorğudan sonra dünya və Avropa arenalarında uğur qazanan naxçıvanlı idmançılar tamaşaçılara təqdim edilib.
Sonda “Bakı-2015” Avropa Oyunlarının loqo və simvolları əks olunan çanta və papaqlar idmançılara hədiyyə edilib.
Qeyd edək ki, analoji tədbir dünən Şərur rayonunda da keçirilib.
“Bakı-2015” Avropa Oyunları Əməliyyat Komitəsinin üzvləri dünən Naxçıvan şəhərindəki Heydər Əliyev Muzeyini ziyarət edib, “Naxçıvanqala” Tarix-Memarlıq Muzey Kompleksi və Duzdağ Fizioterapiya Mərkəzi ilə tanış olublar.
“Buradakı idman obyektləri beynəlxalq standartlar əsasında inşa olunub və uzun müddət ölkə idmanı üçün fayda verəcək səviyyədədir. Bu cür tanıtım tədbirləri muxtar respublikanın bütün rayonlarında təşkil ediləcək”. Bu fikirləri Naxçıvan Muxtar Respublikasında olan “Bakı-2015” Avropa Oyunları Əməliyyat Komitəsinin Kommunikasiya şöbəsinin direktoru Uilyam Lui-Mari deyib.
Qonaq qeyd edib ki, Azərbaycanda son illər idmanın inkişafı öz bəhrəsini verməkdədir və Avropa Oyunları tarixi an kimi yaddaşlara həkk olunacaq: “Məqsədimiz Azərbaycanda baş tutacaq Birinci Avropa Oyunlarını tarixi ana çevirmək və idmançıların karyeralarında silinməyəcək iz buraxmaqdır. Bu məqsədə çatmaq üçün yaradılan şəraitə görə minnətdarlığımızı bildiririk”.
Ceyhun MƏMMƏDOV
