Fevral ayının 4-dən 11-dək paytaxt Bakı şəhərində boks üzrə yeniyetmələr arasında Azərbaycan çempionatı keçirilib. 60 komandadan 300-ə yaxın boksçunun qatıldığı yarışda muxtar respublikamızın idmançıları da iştirak ediblər. Çempionatda qələbə uğrunda səylə mübarizə aparan idmançılarımız muxtar respublikamıza medallarla qayıdıblar. Belə ki, yarışda 52 kiloqram çəkidə rinqə çıxan Tayfur Əliyev ən yüksək nəticəni göstərərək qızıl medal qazanıb. Çempionatda 70 kiloqram çəkidə qüvvəsini sınayan Çingiz Cəfərov ilə 80 kiloqram çəkidə yarışan Nihad Orucovun mübarizəsi isə finala qədər uğurlu olub. Onlar həlledici döyüşlərdə qələbəni əldən verərək ikinci yerə layiq görülüblər. Digər idmançılarımızdan 48 kiloqram çəkidə mübarizə aparan Sərxan Əliyev də ilk görüşlərini öz üstünlüyü ilə başa çatdırıb. Lakin gərgin və maraqlı keçən növbəti döyüşdə təmsilçimiz məğlub olaraq üçüncü yeri tutub. Yarışda fəxri yerləri tutmuş idmançılarımıza diplom, medal və qiymətli hədiyyələr verilib. Eyni zamanda Tayfur Əliyev çempionatın ən yaxşı boksçusu kimi kubokla təltif olunub.

Naxçıvan Muxtar Respublikası
Gənclər və İdman Nazirliyinin mətbuat xidməti