Yeni mövsümə ciddi hazırlaşan “Araz-Naxçıvan” futbol komandası – “qırmızı-ağlar” baş məşqçi Əsgər Abdullayevin rəhbərliyi altında Şərur Olimpiya İdman Kompleksində təlim-məşq toplanışındadır. Artıq altı gündür, burada məskunlaşan komanda gündə iki dəfə meydana çıxır. Keçirilən təlim-məşq toplanışı həm də seleksiya xarakteri daşıyır. Belə ki, əsas heyətin futbolçuları ilə yanaşı, komandaya baxışa dəvət olunan oyunçular da məşqlərdə iştirak edirlər. Məşqləri yaxından izləmək, komandanın hazırkı durumu barədə oxucuları məlumatlandırmaq üçün Şərur rayonuna yollandıq.
Şərur Olimpiya İdman Kompleksində yaradılan şərait hamıya məlumdur. Bu idman obyekti istənilən idman klubunu qəbul etməyə, onların təlim-məşq toplanışına ev sahibliyi etməyə hər zaman hazırdır. Elə bizi kompleksin önündə kompleksin direktoru Ramil Dadaşov qarşıladı. Söhbətimiz zamanı məlum oldu ki, “Araz-Naxçıvan” futbol komandasının burada təlim-məşq keçməsi üçün hər bir şərait yaradılıb. Komanda gündə iki dəfə kompleksin nəzdində olan stadionda məşq edir. Həmçinin futbolçular Üzgüçülük Mərkəzindən və trenajor zalından da istifadə edirlər. Gün ərzində komanda üzvlərinin öncədən müəyyənləşdirilmiş qidalanması həkim nəzarəti ilə həyata keçirilir.
Görülən işlər, aparılan yenidənqurma tədbirləri, formalaşan mükəmməl struktur göz qabağındadır. Xüsusilə Naxçıvan Muxtar Respublikası Ali Məclisinin Sədri tərəfindən idmanın inkişafı üçün verilən müvafiq tapşırıqlardan sonra muxtar respublikada bu sahədə xeyli işlər görülür. Strukturu yeni formalaşan və öz dəst-xətti ilə seçilən Futbol Federasiyası da bu qayğıdan bəhrələnən qurumlardandır. Federasiyanın təşkilatçılığı ilə idman kompleksində yeni formalaşan hakimlər üçün təlim-məşq toplanışı da reallaşır. Belə ki, 6 hakimin iştirak etdiyi məşqlərdə, əsasən, müasir qaydalar müzakirə edilir, əyani şəkildə meydançada göstərilir. Gündə iki dəfə praktik olaraq məşq keçən ədalət təmsilçiləri günün digər saatlarında hakimliklə bağlı nəzəri dərslər də deyirlər. 10 günlük hakimlərin təlim-məşq toplanışında 10 hakim iştirak edəcək.
Budur, “Araz-Naxçıvan”ın axşam məşqinə start verilir. Əsgər Abdullayevlə söhbətə başlamazdan öncə ilk məşqi izləyirik. Məlum olur ki, komandanın üç aparıcı üzvü – Çingiz Qurbanov, Azər Cabbarov və Vüsal Əliyev zədəlidir. Ayxan Həsənov isə yüngül zədə üzündən fərdi məşq edir. Təbii ki, indi hamını daha çox maraqlandıran bir məqam var: Əsgər Abdullayevin məşq və oyun fəlsəfəsi. Hələ 5 il öncə “Araz-Naxçıvan” klubunda çalışan Abdullayevin xeyli ciddi təsir bağışladığı hamıya məlum idi. Əsgər müəllim futbolçular, məşqçi heyəti ilə davranışda da bu ciddiliyini qoruyur. Həmçinin təcrübəli məşqçinin futbolçuları ruhlandırmaq üçün işlətdiyi “Əladır” sözünü kompleksin hər bir tərəfində eşitmək mümkündür. Bununla yanaşı, o, müdafiəçilər, yarımmüdafiəçilər və hücumçularla da ayrı-ayrılıqda işləyir, onların iştirakı ilə kombinasiyalı hücumlar qurdurur. Daha çox diqqəti cəlb edən məqam isə Abdullayevin futbolçulara təkcə topla deyil, topsuz rəftarı da öyrətməyə çalışması idi. Xüsusilə oyunçuların sürət məşqlərində hərəkətlərini baş məşqçi diqqətlə izləyirdi. Sonda keçirilən ikitərəfli oyunu təlim-məşq toplanışında olan hakimlər briqadasının idarə etməsi də diqqətdən yayınmadı.
Məşqdən sonra futbolçular Üzgüçülük Mərkəzinə bərpa məşqi üçün yollandılar. Biz də fürsətdən istifadə edib Əsgər Abdullayevlə təlim-məşq toplanışı barədə danışdıq: “Artıq 6 gündür, buradayıq. Onu deyim ki, komandanın təlim-məşq toplanışı keçməsi üçün hər bir şərait yaradılıb. Ümumiyyətlə, kompleksdə yaradılan şərait nəinki futbol komandaları, həmçinin digər idman növlərində olan klubların da məşq keçməsi üçün əlverişlidir. Daha çox məşqlərimiz topla olur. Çalışırıq ki, futbolçular topu daha çox “hiss etsinlər”. Səhər məşqlərində futbolçuların fiziki göstəricilərinə üstünlük verilir. Axşamlar isə taktiki-texniki məşqlər keçirilir. Heyətimizdəki futbolçuların əksəriyyəti cavandır və onları düzgün karyera qurmaq üçün istiqamətləndirməliyik. Məşqlər zamanı futbolçuların istəkli olması baş məşqçi kimi məni də sevindirir. Ümumiyyətlə, hər zaman futbolçularla söhbət edərkən Naxçıvanın necə futbol ənənəsi olduğunu deyirəm. Bu diyar Azərbaycan futboluna tanınmış simalar bəxş edib. Gələcəkdə heyətimizdə olan futbolçuların ölkə birinciliklərində böyük uğurlar qazanacaqlarına əminəm”.
Əsgər Abdullayev deyir ki, futbolçulara, əsasən, qələbə, qalib olma psixologiyasını aşılamaq lazımdır. O qeyd edir ki, təlim-məşq zamanı hər bir futbolçu ilə ayrılıqda söhbət aparıram. Onun meydanda çatışmayan cəhətlərini, nə etmək lazım olduğunu deyirəm. Eyni zamanda onları məşqlərə psixoloji olaraq hazırlayırıq. Bu zaman futbolçu özündə əlavə güc hiss edir. Məşqçi hər zaman bir psixoloq kimi oyunçunun arxasında dayanmalı, ona güvənməlidir. Deyərdim ki, məşqlərimiz çox ağır keçir. Buna baxmayaraq, futbolçular verilən hər tapşırığın öhdəsindən layiqincə gəlirlər.
Növbəti məşq günü, səhər saat 8-dir. Futbolçulara çətin tapşırıqların verilməsinə, baxmayaraq, onlar günü stadionda açırlar. Baş məşqçi qısa olaraq futbolçulara keçiriləcək məşqin planı barədə məlumat verir. Ardınca topla məşqlərə başlanılır. Məşqdə əsas hədəf rəqib komandanın hücumlarını dəf etmək və rəqibi əks-hücumda yaxalamaqdır. Məşq zamanı Əsgər müəllimin tez-tez hücumları saxlayıb, futbolçulara düzgün mövqe seçməsini söyləməsi diqqətdən yayınmır. Səhər məşqi küncdən asmalar və qapılara zərbələrlə başa çatır.
Keçirilən məşqdən sonra futbolçuların da fikirlərini öyrənirik.
Turqay İbrahimov: “Məşqlərimiz ağır keçir ki, bu da yeni mövsümə iddialı hazırlaşmağımızın göstəricisidir. Qarşıda bizi çətin oyunlar gözləyir. Həmçinin təlim-məşq toplanışından sonra yoldaşlıq görüşlərində qüvvəmizi sınayacağıq. Həmin oyunlarda qələbə qazanıb mövsümə yaxşı başlamaq istəyirik”.
Nicat Əsgərov: “Komandamızın heyətində təcrübəli futbolçularla yanaşı, yeniyetmə oyunçular da vardır. Onların istəklə, böyük əzmkarlıqla məşqlərdə iştirak etməsi komandanın gücünə əlavə güc qatır. Baş məşqçimiz təcrübəli mütəxəssisdir. Bacardığımız qədər ondan nəsə öyrənməyə çalışırıq. Eyni zamanda burada bizim üçün hər bir şərait yaradılıb”.
Elvin Əsədullayev: “Uzun müddətdir ki, “Araz-Naxçıvan”ın heyətində çıxış edirəm. Cari mövsümün məşqlərinə ara vermədən davam edirik. Əla heyətimiz var. Baş məşqçimizin tapşırıqlarını daim yerinə yetirməyə çalışırıq. Yeni mövsümdə iddialı bir komanda kimi meydana çıxacağımıza inanıram”.
Sonda baş məşqçi Əsgər Abdullayev komandanın gələcək planları barədə də məlumat verdi: “Yaxşı heyət formalaşdırmışıq. Zədəli futbolçularımız qarşıdakı həftə komandaya qoşulacaq və məşqlərimizə davam edəcəyik. Əsas hədəfimiz yerli futbolçuları yetişdirmək və onları heyətə cəlb etməkdir. Bunun üçün bizə hər bir şərait yaradılıb. Digər tərəfdən keçirəcəyimiz oyunlarda qələbə qazanmağa köklənmişik. Çünki bir komanda qələbəyə nə qədər köklənərsə, psixoloji tərəfdən hazır olarsa, mövsümün sonunda da bir o qədər uğur qazanılar. Şərur Olimpiya İdman Kompleksində bizim rahatlığımız, məşqləri vaxtında aparmağımız üçün geniş imkanlar vardır. Bu cür təlim-məşq bazasını idmançıların ixtiyarına verdiyinə görə muxtar respublika rəhbərinə minnətdarlığımızı bildiririk. Eyni zamanda futbolçuları dəstəkləyən Gənclər və İdman Nazirliyinə, Futbol Federasiyasına təşəkkürümü bildirirəm”.
Ceyhun MƏMMƏDOV
