Muxtar respublikada gənclərin idmana cəlbi, onlara sağlam həyat tərzinin aşılanması daim diqqət mərkəzində saxlanılır. Bu işlərin davamlı həyata keçirilməsi və yaradılan müasir idman infrastrukturu gənclərin bədən tərbiyəsi və idmana olan marağını artırır. İdmanın kütləviliyinə nail olunması, yeniyetmə və gənclərin idmana cəlbi istiqamətində məqsədyönlü işlər görülür, müxtəlif növlər üzrə çoxsaylı yarışların təşkili davam etdirilir. Bütün bunların nəticəsidir ki, yeni idmançılar nəsli yetişir, bu sahədə uğurların sayı daha da artır.
Naxçıvan Muxtar Respublikasının Gənclər və İdman Nazirliyi yeni-yeni nailiyyətlərin əldə edilməsi üçün gənclərlə bağlı bir sıra tədbirlər həyata keçirir. Hər il mütəmadi keçirilən “Şahin” hərbi-idman oyunlarında iştirak edəcək gənclər üçün nazirlik tərəfindən 224 dəst yeni forma alınıb. Həmin formalar yüksək dözümlülüyü və keyfiyyəti ilə seçilir. Artıq muxtar respublikanın şəhər və rayonlarında fəaliyyət göstərən Gənclər və İdman idarələri vasitəsilə “Şahin” hərbi-idman oyunlarının iştirakçıları idman geyimləri ilə təmin olunublar.
Yeri gəlmişkən qeyd edək ki, “Şahin” hərbi-idman oyunlarının Naxçıvan Muxtar Respublikası üzrə zona birinciliyinin qalibi olan Naxçıvan şəhər 1 nömrəli tam orta məktəbin komandası artıq Azərbaycan çempionatına yollanır. Naxçıvanı təmsil edəcək komandanın üzvləri yarışlarda həmin formalarda iştirak edəcəklər.
Ceyhun MƏMMƏDOV
