Bakı şəhərində yüngül atletika üzrə Azərbaycan çempionatı keçirilib.
Ölkə birinciliyində Naxçıvan Muxtar Respublikası Yüngül Atletika Federasiyasının yetirmələri də mübarizə aparıblar. İki gün davam edən çempionatda atletlərimiz fərdi yarışlarda 6, kollektiv yarışlarda isə 1 dəst medal qazanıblar.
Çempionatın ilk günündə atletlərimizdən Gülayə Cəfərova 1500 metr məsafədə bütün rəqiblərini geridə qoymağı bacarıb. Digər atletimiz Sevgi Məmmədli həmin məsafədə qaçış üzrə bürünc medal qazanıb.
Çempionatın ikinci günündə isə Gülayə Cəfərova 3000 metr məsafədə qüvvəsini sınayıb və idmançımız yenə də fəxri kürsünün ən yüksək pilləsinə qalxıb. Ümumiyyətlə, bu məsafədə qaçış üzrə ilk 3 pillədə Naxçıvan idmançıları qərarlaşıblar. Belə ki, Xatun Oruclu və Sevgi Məmmədli müvafiq olaraq ikinci və üçüncü olublar.
Oğlanların mübarizəsində isə Səfər Tağıyev 3000 metr məsafədə qaçış üzrə Azərbaycan çempionatının bürünc mükafatçısı olub. Oğlanlardan ibarət komandamız 4x200 metr estafet qaçışında ölkə birinciliyinin bürünc medalını qazanıb.
Sonda qalib idmançılarımız təşkilatçılar tərəfindən diplom və medallarla təltif olunublar.
Qeyd edək ki, ötən gün Azərbaycan Atletika Federasiyası Hakimlər Kollegiyası sədrinin və yaş qruplarına uyğun olaraq baş məşqçilərinin iştirakı ilə seminar keçirilib. Naxçıvan Muxtar Respublikası Yüngül Atletika Federasiyasının məşqçi-müəllimləri və ölkə birinciliyində uğur qazanan idmançıların iştirak etdiyi seminarda yeni qaydalar haqqında məlumatlar verilib, iştirakçılar təlimatlandırılıb.

 Ceyhun MƏMMƏDOV