Azərbaycan Respublikası Daxili İşlər Nazirliyinin xidməti idman tədbirlərinin təqvim planına əsasən cüdo üzrə daxili işlər orqanlarının birinciliyi keçirilib.
Birinciliyin açılış mərasimində çıxış edən DİN İdman Cəmiyyətinin sədri, Olimpiya, dünya və Avropa çempionu, polis polkovniki Zemfira Meftaxetdinova Azərbaycanda idmana və idmançılara göstərilən diqqət və qayğıdan söhbət açaraq bildirib ki, bu gün idmançılarımız beynəlxalq yarışlarda uğurlu nəticələr qazanır və vətənimizi layiqincə təmsil edirlər. Azərbaycan təmsilçilərinin ən mötəbər yarışlarda əldə etdiyi qələbələr, keçirilən idman tədbirlərinin miqyası respublikamızın dünyanın ən güclü idman ölkələrindən birinə çevrildiyinin əyani sübutudur.
Bildirilib ki, Azərbaycanın sürətli, dinamik inkişafı idman sahəsində də özünü göstərir. Bütün bu nailiyyətlərin əsasında ulu öndərimiz tərəfindən müəyyənləşdirilən, dövlət başçımızın uğurla davam və inkişaf etdirdiyi düzgün siyasət durur. Bizim ölkəmiz məhz bu siyasətin sayəsində həm də mühüm beynəlxalq idman yarışlarının məkanına çevrilib.
Daha sonra yarışlara start verilib.
DİN İdman Cəmiyyətində keçirilən bu yarışda ərazi polis orqanları, nizami hissə və tədris müəssisələrini təmsil edən, ümumilikdə, 11 komanda heyətində 90 idmançı tatami üzərinə çıxıb.
Gərgin keçən yarışlarda iştirakçılar arasında Naxçıvan Muxtar Respublikası Daxili İşlər Nazirliyinin də 7 idmançısı mübarizə aparıb. Ən yaxşı nəticəni Rəşad Həsənov və Sadiq Qasımov göstəriblər. Onlar müvafiq olaraq 66 və 100+ kiloqram çəki dərəcələrində bütün rəqiblərinə qalib gələrək birinci yerə layiq görülüblər. 60 kiloqram çəki dərəcəsində Elşən Qasımov, 90 kiloqram çəki dərəcəsində Elvin Əliquliyev və 100 kiloqram çəki dərəcəsində Cavanşir Yaqubov yalnız final görüşlərində məğlub olublar. Orxan Babayev (73 kiloqram) və Qartal Əliyev (66 kiloqram) isə birinciliyin bürünc medalını qazanıblar.
Naxçıvan Muxtar Respublikası Daxili İşlər Nazirliyinin İdman Cəmiyyətinin rəisi, polis polkovniki Cavanşir Salayev ən yaxşı komanda hazırladığına görə xüsusi diplomla təltif olunub.
Sonda qalib idmançılarımıza diplom, medal və hədiyyələr təqdim olunub.
Ceyhun MƏMMƏDOV
