Culfa Rayon Gənclər və İdman İdarəsi ilə Naxçıvan Muxtar Respublikası Voleybol Federasiyasının Culfa rayon bölməsinin birgə təşkil etdiyi şəhər və kənd komandaları arasında “Zərərli vərdişlərə yox deyək, həmişə sağlam olaq” devizi altında kişilər arasında voleybol üzrə rayon birinciliyinə start verilib.
Yarış əsasnaməyə uyğun olaraq iki yarımqrupda olimpiya sistemi üzrə müvafiq olaraq Əbrəqunus və Culfa şəhər 3 nömrəli tam orta məktəblərin idman zallarında keçirilir. Birincilikdə 12 komandanın heyətində 144 idmançı mübarizə aparır.

İlk olaraq Əbrəqunus kənd tam orta məktəbinin idman zalında Əbrəqunus və Bənəniyar kənd komandaları qarşılaşıblar. Görüşdən öncə rayon Gənclər və İdman İdarəsinin əməkdaşı Elçin Cəfərov, Voleybol Federasiyasının Culfa rayon bölməsinin sədr müavini Elməddin Qəribov çıxış edərək keçirilən tədbirlərin mahiyyətindən, yeniyetmə və gənclərə göstərilən diqqət və qayğıdan, idmanda əldə olunan ən son nailiyyətlərdən və federasiyaların qarşısına qoyulan vəzifələr və bu sahədə görülən işlər haqqında tədbir iştirakçılarına geniş məlumat veriblər. Çıxışlardan sonra oyunun baş hakimi Afrəddin Cəfərov oyunun qaydaları haqqında idmançıları məlumatlandırıb.
Gərgin mübarizə şəraitində keçirilən görüşdə qalib gələn Bənəniyar kənd komandası növbəti mərhələyə yüksəlib.

Ceyhun MƏMMƏDOV