Culfa Rayon Uşaq-gənclər şahmat məktəbində rayon Gənclər və İdman İdarəsi ilə Naxçıvan Muxtar Respublikası Şahmat Federasiyasının Culfa rayon bölməsinin birgə təşkil etdiyi yeniyetmə şahmatçılar arasında şahmatın tempo növü üzrə şəhər birinciliyinə yekun vurulub.
Yarış əsasnaməyə uyğun olaraq İsveçrə sistemi üzrə (7 tur) təşkil edilib. Rayon Gənclər və İdman İdarəsinin əməkdaşı Elçin Cəfərov, Təhsil Şöbəsinin məsləhətçisi Səbuhi İbrahimov və Uşaq-gənclər şahmat məktəbinin direktor əvəzi Vüsalə Ələkbərova çıxış edərək rayonda idmana göstərilən diqqət və qayğıdan danışıblar. Çıxışlardan sonra yarışın baş hakimi Nigar Dünyamalıyeva oyunun qaydaları haqqında idmançıları məlumatlandırıb.
Gərgin mübarizə şəraitində keçən görüşdə Elcan Qulamzadə 6 xalla birinci yerə layiq görülüb. Sunay Kərimli 5,5 xalla ikinci, Əli Qulamzadə isə 5 xalla üçüncü olublar.
Qaliblərə diplom və hədiyyələr təqdim edilib.
Ceyhun MƏMMƏDOV
