Naxçıvan Muxtar Respublikası Şərq Döyüş Sənəti Federasiyasının yetirmələri Kempo Qarışıq Döyüş növü üzrə keçirilən Bakı şəhəri açıq çempionatında iştirak ediblər.
Çempionat gənclər və kişilər arasında olmaqla, iki – döyüş və grappling (güləş – ağrıdıcı fənd tətbiq etmək) versiyaları üzrə keçirilib. Bu yarışda 3 idmançımız mübarizə aparıb və onlar, ümumilikdə, 6 müxtəlif əyarlı medal qazanıblar. Belə ki, döyüş növündə ən uğurlu nəticəni Kamal Həsənov əldə edib. O, bütün rəqiblərinə qalib gələrək çempionatın baş mükafatını qazanıb. Digər idmançılarımız Nurlan Qafarov və Fərəc Quliyev isə müvafiq olaraq çempionatda ikinci və üçüncü olublar.
Grappling növündə (gənclər) ­50 kiloqram çəki dərəcəsində Kamal Həsənov yenə fəxri kürsünün ən yüksək zirvəsinə qalxıb. Kişilərin mübarizəsində Fərəc Quliyev (50 kiloqram) də eyni uğuru təkrarlayıb. 65 kiloqram çəki dərəcəsində mübarizə aparan Nurlan Qafarov isə bu növdə üçüncü olub.
Sonda idmançılarımız təşkilatçılar tərəfindən diplom və medalla təltif olunublar.

Ceyhun MƏMMƏDOV