Gənclərin idmana cəlbi istiqamətində görülən tədbirlərin davamı olaraq Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Ali Məclisinin Sədri yanında Gənclər Fondu, şəhər və rayon Gənclər və İdman idarələrinin təşkilatçılığı ilə gənclərdən ibarət kənd komandaları arasında futbol üzrə şəhər və rayon birinciliyində növbəti oyunlar keçirilib.
Sədərək rayonunda qalib komandanın adı artıq məlumdur. Belə ki, həlledici qarşılaşmada Sədərək kənd komandası və “Sədərək-2” komandası üz-üzə gəlib. Daha baxımlı oyun nümayiş etdirən birincilər meydanı 4:0 hesablı qələbə ilə tərk ediblər və birinciliyin baş mükafatını qazanıblar. Digər final görüşü Kəngərli rayonunun mərkəzi stadionunda keçirilib. Final görüşündə Qıvraq kənd komandası Xok kənd komandasının qapısından 5 top keçirib (5:1) və birinciliyi ilk pillədə başa vurub. Sonda hər iki rayonda qalib olan komandalara Naxçıvan Muxtar Respublikası Gənclər və İdman Nazirliyinin, Naxçıvan Muxtar Respublikası Ali Məclisinin Sədri yanında Gənclər Fondu tərəfindən kubok və hədiyyələr təqdim olunub.
Digər bolqollu oyun Şahbuz rayon mərkəzi stadionunda qeydə alınıb. İlk olaraq meydana Kolanı və Nursu kənd komandaları çıxıb. Görüş Kolanı futbolçularının 4:1 hesablı qələbəsi ilə yekunlaşıb. Şahbuzkənd və Kükü kənd komandalarının qarşılaşmasında isə azarkeşlər 10 qola şahidlik ediblər. Bu matçda Kükü futbolçuları meydanı 6:4 hesablı qələbə ilə tərk ediblər.
Şərur rayonunda növbəti mərhələyə Mahmudkənd və Çərçiboğan kənd komandaları yüksəlib. Mahmudkənd stadionunda keçirilən görüşdə meydan sahibləri Kürçülü kənd komandasını (3:2), Aralıq kənd stadionunda isə Çərçiboğan kənd komandası Dizə kənd komandasını (3:1) məğlub edərək, buna müvəffəq olublar.
Babək rayonunda da iki görüş baş tutub. Dairəvi sistem üzrə keçirilən oyunlarda Nehrəm kənd komandası babəkli həmkarlarının müqavimətini qıra bilməyib – 3:3. Nəhəcir kənd komandası isə Sirab kənd komandasının qapısından 3 cavabsız top keçirməyə müvəffəq olub – 3:0.
Culfa rayon Ərəzin kənd stadionunda Bənəniyar kənd komandası Kırna kənd komandasını, Bənəniyar kənd stadionunda isə Ərəzin kənd komandası Əbrəqunus kənd komandasını sınağa çəkib. Bu görüşlərdə Bənəniyar (3:2) və Ərəzin kənd komandaları (6:2) meydanı qələbə ilə tərk ediblər. Ordubad rayonunda keçirilən görüşdə “quru hesab” qeydə alınıb. Belə ki, Aza kənd komandası Kələntər Dizə kənd stadionunda Vənənd kənd komandasını qəbul edib və 3:0 hesablı qələbə qazanıb.
Ceyhun MƏMMƏDOV
