Gənclərin idmana cəlbi istiqamətində görülən tədbirlərin davamı olaraq Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Ali Məclisinin Sədri yanında Gənclər Fondu, şəhər və rayon Gənclər və İdman idarələrinin təşkilatçılığı ilə gənclərdən ibarət kənd komandaları arasında futbol üzrə şəhər və rayon birinciliyinin növbəti oyunları keçirilib.
Culfa rayonunun Ərəzin kənd stadionunda baş tutan görüşdə Kərki və Camaldın kənd komandaları üz-üzə gəlib. Görüş Kərki kənd futbolçularının 4:2 hesablı qələbəsi ilə yekunlaşıb. Kəngərli rayon mərkəzi stadionunda təşkil edilən görüşdə isə Xok və Şahtaxtı kənd komandaları qarşılaşıb. Azarkeşlərin 13 qola şahidlik etdiyi matçda Xok kənd komandası 7:6 hesabı ilə qələbə qazanıb.
Şahbuz rayon mərkəzi stadionunda Şahbuzkənd və Külüs kənd komandaları qarşılaşıb. Görüşü 5:1 hesablı qələbə ilə başa vuran birincilər növbəti mərhələyə yüksəlib. Ordubad rayonunda isə Vənənd kənd komandası rayonun “Gənclər birliyi” komandasını 3:0 hesabı ilə məğlub ediblər. Babək rayonunda iki görüş keçirilib. Babək qəsəbə stadionunda meydan sahibləri Çeşməbasar kənd komandasını (3:1), Vayxır kənd stadionunda isə meydan sahibləri Sirab kənd komandasını (3:0) məğlubiyyətə uğradaraq növbəti mərhələyə adlayıblar.
Sədərək rayonunda uğur qazanan komanda Sədərək kənd komandası olub. Onlar Qaraağac kənd komandasının qapısından 4 qol keçirməklə buna müvəffəq olublar – 4:1. Həftənin ən maraqlı görüşü isə Şərur rayon Aralıq kənd stadionunda baş tutub. Yerli komanda Çərçiboğan kənd komandasını sınağa çəkib. Görüşün əsas vaxtı 2:2 hesabı ilə başa çatdığından qalibi penalti zərbələri müəyyən edib. Zərbələri daha dəqiq yerinə yetirən Çərçiboğan kənd komandası 6:5 hesabı ilə qələbə qazanıb.
Naxçıvan şəhəri üzrə isə birinciliyin final oyunu keçirilib. Bu görüşdə Bulqan və Qaraçuq kənd komandaları qarşılaşıb. Gərgin mübarizə şəraitində keçən görüşdə 9:6 hesabı ilə Qaraçuq kənd komandası qalib gəlib. Beləliklə, birinciliyin yekununa əsasən I yerə Qaraçuq kənd komandası, II yerə Bulqan kənd komandası, III yerə isə Qaraxanbəyli kənd komandası layiq görülüb.
Qeyd edək ki, bu tur 12 avqust – Beynəlxalq Gənclər Gününə həsr edilib.
Ceyhun MƏMMƏDOV
