Ümummilli liderimiz Heydər Əliyevin 90 illik yubileyi münasibətilə keçirilən “Naxçıvan Open-2013” Beynəlxalq Şahmat Festivalında V turun oyunları yekunlaşıb. Bu turda “C” qrupunda Şərur şahmatçısı Rəvan Rəhimov Bakı şahmatçısı Kənan Qarayevlə qarşılaşıb. Bu oyundan hər iki şahmatçı yarım xal əldə edib. V turdan sonra Rəvan Rəhimov 4,5 xalla turnir cədvəlinə liderlik edir. İkinci və üçüncü yerləri isə Sumqayıt şahmatçıları Murad İbrahimli və Kamal Əzizov bölüşdürürlər.
“B” qrupunda 5 xalla Bakı şahmatçısı Fariz Əhmədov birinci sıradadır. İkinci və üçüncü yerləri isə Bakı şahmatçıları Rəşad Zeynalov və Anar Ələkbərov bölüşürlər. Ötən turdan sonra da birinci sırada olan Fariz Əhmədov liderlik mövqeyini Bakı şahmatçısı Azər Abdullayev üzərində qazandığı qələbədən sonra təmin edib.
Ən yüksək reytinqli şahmatçıların yarışdığı “A” qrupunda Aleksey Aleksandrov liderlik mövqeyini bu turda saxlaya bilməyib. V turdan sonra Rusiya idmançısı İqor Kurnosov 4 xalla birinci sırada yer alıb. Azərbaycan şahmatçısı Eltac Səfərli ikinci, polşalı Macieja Bartlomiey üçüncü sıradadır. İqor Kurnosov Hindistan şahmatçısı Gupta Abhijeeti məğlub edib. Aleksey Aleksandrov gürcü şahmatçı Mikeil Mçedlişvili ilə görüşdən yarım xal toplayıb. Naxçıvan şahmatçılarından Ürfan Sevdimalıyev Azərbaycan şahmatçısı Zaur Məmmədovla görüşdən yarım xal əldə edə bilib. Digər bir Naxçıvan şahmatçısı, FİDE ustası Talıb Babayev Nərmin Xələfova ilə görüşdə qələbə əldə edib və aktivinə 1 xal yazdırıb.­
Festival davam edir.

Xəbərlər şöbəsi