Azərbaycan xalqının ümummilli lider­i Heydər Əliyevin 90 illik yubileyi münasibətilə keçirilən “Naxçıvan Open-2013” Beynəlxalq Şahmat Festivalı davam edir. İkinci turda “A” qrupunda rusiyalı şahmatçı Vladimir Potkin Aleksey Aleksandr­ovla görüşdə məğlub olub. Sergey Ziqalkonun Hindistan şahmatçısı Gupta Abhijeetlə görüşü heç-heçə başa çatıb. Aleksandr Xalifman isə Türkan Məmmədyarovanı məğlub edib. Zeynəb Məmmədyarova naxçıvanlı şahmatçı Talıb Babayevi məğlub edib və aktivinə bir xal yazdırıb. Digər bir Naxçıvan şahmatçısı Ürfan Sevdimalıyev isə Misrətdin İsgəndərovu mat edə bilməyib. İkinci turdan sonra “A” qrupunda turnir cədvəlində birinci sırada belarusiyalı şahmatçı Aleksey Aleksandrov yer alıb. İkinci yerdə rusiyalı şahmatçı İqor Kurnosov, üçüncü yerdə isə Aleksandr Xalifman qərarlaşıb. Azərbaycan şahmatçısı Qadir Hüseynov isə ikinci turdan sonra dördüncü yerlə kifayətlənməli olub. “B” qrupunda isə ikinci turdan sonra turnir cədvəlinə 2 xalla azərbaycanlı şahmatçı Anar Ələkbərov liderlik edir. İkinci sırada iranlı şahmatçı Amin Təbatəbai, üçüncü sırada isə Azərbaycan şahmatçısı Nurlan Şabanov yer alıb. “C” qrupunda Naxçıvan şahmatçısı Sadiq Məmmədov turnir cədvəlində lider olub.
Üçüncü turda isə “C” qrupunda Sumqayıt şahmatçısı Kamal Əzizov turnir cədvəlinin birinci sırasına yüksəlib. Gəncə şahmatçısı Qurban Bayramov ikinci pillədə yer alıb. Bu turda “B” qrupunda ilk üç yeri Anar Ələkbərov, Amin Təbatəbai, Fariz Əhmədov bölüşdürürlər. Gərgin mübarizələrin aparıldığı “A” qrupunda Aleksey Aleksandrov birincidir. Turnir davam edir.

Xəbərlər şöbəsi