Aprelin 22-dən etibarən Naxçıvan Muxtar Respublikası Şərq Döyüşü Sənəti Federasiyasının idmançıları arasında peşəkar qarışıq döyüş növləri üzrə təlim-məşqlər keçirilir.
Təlim-məşqlər Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Şərq Döyüşü Sənəti Federasiyası tərəfindən muxtar respublikamıza dəvət olunmuş Azərbaycan FAİT Klubunun heyətinin iştirakı ilə keçirilir. Muxtar respublikamızda peşəkar qarışıq döyüş növlərini təbliğ etmək, uşaq və gənclərdə bu idman növünə marağı artırmaq məqsədilə keçirilən təlim-məşqlər əvvəlcə Şərq Döyüşü Sənəti Federasiyasının Şərur rayonunda məşğul olan idmançıları arasında təşkil edilib. Azərbaycan FAİT Klubunun prezidenti, dünya və Avropa çempionu Şəhriyar Abbasovun rəhbərliyi ilə baş tutan məşqlərdə klubun dünya və Avropa çempionları olan idmançıları da iştirak edirlər. Şərur rayon idmançıları ilə görüşdə Şəhriyar Abbasov peşəkar qarışıq döyüş növləri ilə bağlı ətraflı məlumat verib. Sonra bu idman növünün texniki-taktiki hazırlıqları idmançılara nümayiş olunub.
Aprelin 23-də Naxçıvan şəhərindəki İlham Əliyev adına Olimpiya İdman Kompleksinin Üzgüçülük Mərkəzində FAİT Klubunun heyətinin iştirakı ilə mətbuat konfransı keçirilib.

Naxçıvan Muxtar Respublikası
Gənclər və İdman Nazirliyinin mətbuat xidməti