Azərbaycan xalqının ümummilli lideri Heydər Əliyevin 90 illik yubileyi  münasibətilə keçirilən  “Naxçıvan Open-2013” Beynəlxalq Şahmat Festivalı davam edir. İsveçrə sistemi ilə “A”, “B” və “C” qrupları üzrə keçirilən festivalda təcrübəli şahmatçılar qüvvələrini sınayırlar. “A”qrupunda reytinq əmsalı 2665 olan rusiyalı şahmatçı, Avropa çempionu Vladimir Potkin, reytinq əmsalı 2662 olan azərbaycanlı şahmatçı Rauf Məmmədov, reytinq əmsalı 2656 olan belarusiyalı şahmatçı Sergey Ziqalko, reytinq əmsalı 2650 olan hollandiyalı şahmatçı Sergey Tiviyakov qələbə uğrunda mübarizə aparırlar. Bu qrupda Naxçıvan şahmatçılarından beynəlxalq usta Talıb Babayev və FİDE ustası Ürfan Sevdimalıyev də yarışır. “B” və “C” qruplarında isə  mübarizə aparanların əksəriyyətini Azərbaycandan, eləcə də Naxçıvan Muxtar Respublikasından olan şahmatçılar təşkil edir. “A” qrupunda ilk turda Vladimir Potkin türkiyəli şahmatçı Sanal Vahapla görüşüb. Bu görüşdən Vladimir Potkin 1 xalla ayrılıb. Naxçıvanlı şahmatçı Talıb Babayev isə Sergey Ziqalkoya məğlub olub. İkinci turun nəticələrinə görə, hələlik bu qrupdakı Naxçıvan şahmatçıları aktivlərinə xal yazdıra bilməyiblər. Festival davam edir.

Səbuhi HÜSEYNOV