Naxçıvanlı idmançılar daha bir böyük uğura imza atıblar. Belə ki, Azərbaycan Universal Döyüş Federasiyasının idmançıları Ukraynanın Odessa şəhərində Avropa çempionatına yollanıblar. Qitə birinciliyinə yollanan 14 nəfərlik heyətdə iki Naxçıvan idmançısı da yer alıb.
95 kiloqram çəki dərəcəsində mübarizə aparan Xəyal Abdullayev ilk turda Belçika idmançısına qalib gəlib və yarımfinala yüksəlib. Bu mərhələdə onun rəqibi çexiyalı idmançı olub. Qələbəni bu mərhələdə də qeyd edən idmançımız finalda Ukrayna təmsilçisi ilə üz-üzə gəlib. Həll­edici qarşılaşmada da üstünlüyü əldən verməyən Xəyal Abdullayev Avropa çempionu adını qazanıb.
Digər idmançımız – 90 kiloqram çəki dərəcəsində mübarizə aparan Ruslan Səfərov isə ilk iki mərhələdə gürcü və moldovalı idmançıları məğlub edib. Lakin final görüşündə o, Ukrayna idmançısına məğlub olaraq qitə birinciliyinin gümüş medalını qazanıb.
Sonda hər iki idmançımıza təşkilatçıların diplom və medalları təqdim olunub.

 Ceyhun Məmmədov