Naxçıvan Muxtar Respublikası Mədəniyyət və Turizm Nazirliyinin təşkilatçılığı ilə Culfa rayonunun Ərəfsə kəndində kənd yaşıl turizminin inkişaf etdirilməsi ilə bağlı maarifləndirici tədbir keçirilib.
Ərəfsə, Milax, Ləkətağ kəndləri sakinlərinin iştirak etdikləri tədbirdə Naxçıvan Muxtar Respublikası Mədəniyyət və Turizm Nazirliyi Aparatının Turizm şöbəsinin müdiri Piri Nağıyev “Culfa rayonunun Ərəfsə, Milax və Ləkətağ kəndlərinin turizm potensialı” mövzusunda çıxış edərək kənd yaşıl turizmi haqqında danışıb. Bildirilib ki, Ərəfsə, Milax və Ləkətağ kəndlərində bu sahəni inkişaf etdirmək üçün geniş imkanlar və şərait mövcuddur.
Qeyd olunub ki, zəngin təbiətimiz, ekoloji cəhətdən təmiz qida məhsullarımız, şəfalı sularımız muxtar respublikada ekoloji və kənd yaşıl turizminin inkişafını şərtləndirən əsas amillərdəndir.
Turizmin inkişafında vətəndaşların da üzərinə müəyyən vəzifələr düşdüyü tədbir iştirakçılarının diqqətinə çatdırılıb, mart ayında Naxçıvan Muxtar Respublikası Ali Məclisində turizmin inkişafı ilə bağlı keçirilən müşavirə haqqında məlumat verilib.
Kənd turizmində evlərdə turistlərə göstəriləcək xidmətlər, qiymətlər və gəlirlərin formalaşması, turizmlə bağlı ölkəmizdə yaradılmış qanunvericilik bazası haqqında söhbət açılıb və bildirilib ki, evlər turistlərə bir neçə günlük və ya aylıq kirayə verilə bilər ki, bu da kənd sakinlərinin maddi durumunun yaxşılaşdırılmasına xidmət edər. Təbii ki, qiymətlər evdə yaradılan şəraitlə bağlı olacaqdır.
Naxçıvan Turizm İnformasiya Mərkəzinin direktoru Gülnarə Sadiqova “Turizm İnformasiya Mərkəzinin kənd yaşıl turizminin təbliğində rolu” mövzusunda çıxış edib.
Sonda tədbir iştirakçılarını maraqlandıran suallar cavablandırılıb.

Əli Rzayev