Muxtar respublikamızda davam edən sürətli sosial-iqtisadi inkişaf turizm sahəsində də özünü göstərməkdədir. Regiona turist axınının artması burada iqtisadiyyatın digər sahələrinin də inkişaf etdirilməsinə təsir göstərməklə yanaşı, eyni zamanda səyahətçilərin Naxçıvanı daha yaxından tanımalarına imkan yaradır.

2014-cü ilin yekunlarına görə, muxtar respublikamıza ölkəmizin digər bölgələrindən və xarici ölkələrdən, ümumilikdə, 378 min 102 nəfər turist gəlib. Muxtar respublikaya səfər edən turistlərin səyahət motivlərinə uyğun olaraq, onların asudə vaxtlarının, istirahət, əyləncə və müalicəsinin təşkil olunması, tranzit və işgüzar məqsədli turistlər üçün zəruri infrastrukturun yaradılması Naxçıvana səyahət edən turistlərin sayının artmasına səbəb olub. Naxçıvanın turizm ehtiyatlarının daha çox turizm dövriyyəsinə cəlb olunması, servis sektorunun peşəkarlığının artması, Naxçıvan şəhərində və bölgələrdə istirahət, asudə vaxt mərkəzlərinin yaradılması, müasir standartlara cavab verən restoran və yeməkxana şəbəkəsinin təşkili turizmin inkişafına müsbət təsir edən amillərdəndir.
Hazırda Naxçıvana səfər edən əcnəbi turistlər arasında Türkiyə, İran, Rusiya, Ukrayna, Qazaxıstan, Gürcüstan, Avropa Birliyi ölkələri, Amerika Birləşmiş Ştatları, Baltikyanı ölkələr, Cənubi Koreya, Çindən gələn turistlər üstünlük təşkil edir. Xarici ölkələrdən gəlmiş turistlər burada işgüzar görüşlər keçirməyə, muxtar respublika ərazisindəki görməli təbiət guşələri, tarixi abidələr və muzeylərlə tanış olmağa, ziyarətlərini yerinə yetirməyə, təbii və klinik üsullarla müalicə olunmağa daha çox maraq göstərirlər. Naxçıvanda qış turizmi üçün də mövcud olan iqlim və relyef şəraiti burada turizmin bütün mövsümlərdə inkişafı üçün yaxşı imkanlar yaradır.

Xəbərlər şöbəsi